Yesaya 54 - Mandinka Bible

Kayira kambeŋo badaa-badaamaa

¹ Yaawe* ko: “Yerusalaamu, suukuwo laa. I ka muluŋ ne ko musoo meŋ nene maŋ diŋo soto. Suukuulaa dati, i ye sari seewoo kamma la. Ite musu kiideeriŋo, meŋ maŋ tiŋo la koleyaa loŋ, i be diŋ jamaa soto la le, ka tambi musoo la, kewo be meŋ bulu.

² “I la tiriliisi* loodulaa fanundi, i ye a faanoolu waree ì ye fanu, kana tonkutonku, a juloolu jamfandi, i ye a pikaloolu bambandi.

³ Kaatu i be tara la karoo bee le la, bulubaa niŋ maraa, i koomalankoolu be banku koteŋolu la kenoo buusi la le, ì ye naa sabati saatee tumbundiŋolu to.

⁴ “Kana sila, kaatu i te duŋ na malu kuwo kono. Kana jikilateyi, kaatu i te dooyaa soto la. I be ñina la maloo la le, meŋ keta i la i fondinkeemaa, aduŋ i hakiloo te bula la maloo la, biriŋ i keta furuyaamusoo ti.

⁵ Kaatu nte i Daamansoo ka munta le ko i keemaa. Yaawe Alihawaa Maariyo* le mu n too ti, nte Banisirayila la Senuŋ Baa le mu i kumakaalaa ti, ì ka a fo n ye le ko, duniyaa bee la Alla.”

⁶ I la Alla ko: “Nte Yaawe be i kumandi la le kotenke, komeŋ niŋ ite mu musu le ti, meŋ keemaa ye a bula, a niyo be toorariŋ, musoo meŋ futuuta a dindimmaa, a keemaa ye a bayi.

⁷ Ŋa i fili jee le fo waatindiŋ, bari m be i murundi la naŋ ne, kaatu m balafaata i ye baake le.

⁸ N jusoo bota nuŋ baake le, ŋa n koo dii i la domandiŋ, bari m be n na kanu bambaloo yitandi la i la le, ŋa balafaa soto i ye.” Yaawe i Kumakaalaa le ye a fo.

⁹ “Ñiŋ ka muluŋ nte fee le ko Nuha la waatoo, biriŋ n kalita ko, Tuufaani Waamoo te duniyaa muru la kotenke. Wo to saayiŋ, n kalita le ko, n te kamfaa la i kamma kotenke, n te i jalayi la kotenke.”

¹⁰ Yaawe meŋ ye balafaa soto i ye, wo le ye a fo ko: “Hani niŋ konko baalu bota ì noo to, konkoriŋolu ka boyi, ŋa kanu bambaloo meŋ soto i ye, wo te daŋ na, sako n na kayira kambeŋo si tiñaa.

¹¹ “Hee saatee bataariŋo, turubaadoo ye i mantoora le, aduŋ ì maŋ i sabarindi. Bari saayiŋ m be i lookuu la niŋ bere ñiimaa le la, m be i la fondamaŋolu laa la niŋ safiiri beroolu le la.

¹² M be i la tatoolu loo la niŋ luuluwolu le la, i la dundaŋ daalu niŋ bere ñeliñeliriŋolu la, i la sansaŋo muumee ye loo niŋ bere daa jawoolu la.

¹³ Nte Yaawe le be i dinkewolu bee karandi la, aduŋ i diŋolu be tara la kayira baa le kono.

¹⁴ I be tara la bambandiŋ tiliŋo le kaŋ. Mantooroo be jamfa la i la le, i kijoo te fara la, silaŋ kuu baa fanaa te kata la i la.

¹⁵ Niŋ moo-wo-moo ye i boyinkaŋ, a maŋ ke nte la lañinoo ti. Moo-wo-moo ye i boyinkaŋ, be boyi la le.

¹⁶ “A juubee, nte le ye neefiŋ numoo daa, meŋ ka keñemboo fee a ye mala, ka jooraŋo dadaa ka keloo ke. Aduŋ nte le ye tiñaarilaa daa, ka tiñaaroo ke.

¹⁷ Bari jooraŋ-wo-jooraŋ dadaata i kamma, a te taama la. Moo-wo-moo ye i tuumi a neŋ kolomoo la, i be a faniyandi la le. Wo le mu n na dookuulaalu ye keetaafeŋo ti, aniŋ ì la kañeeroo ka bo m bulu.” Yaawe le ye a fo.