Yesaya 47 - Mandinka Bible

Babiloni la boyoo

¹ Yaawe* ko: “Ite Sunkutoo Babiloni, sii buutoo kono, Dimmusuriŋ* Babiloni, wuli i la mansasiiraŋo kaŋ, i ye sii bankoo to. Ì te i kumandi la yele mereŋo la kotenke, waraŋ sunkutu ñiimaa.

² I la kuŋ bitiraŋo bondi, i ye tuurilaŋ beroo taa, i ye siimaŋo juru. I la faanoo wulindi, i wutoolu ye tara banta, i ye boloŋo teyi.

³ I kenseŋo le be tara la looriŋ, moolu ye i maluriŋo je. M be makatoo bayi la le, moo te kana la n na mantooroo la.”

⁴ Ǹ kumakaalaa mu Banisirayila la Senuŋ Baa le ti. A too mu Yaawe Alihawaa Maariyo* le ti.

⁵ Yaawe ko, “Dimmusuriŋ Babiloni, tara siiriŋ diboo kono, i ye tenkuŋ jee. Ì te i kumandi la bankoolu la musumansoo* la kotenke.

⁶ Kabiriŋ n kamfaata n na moolu kamma, m maŋ ì ke m faŋo taa ti kotenke, ŋa ì duŋ i bulu le, bari i maŋ balafaa soto ì ye. I ye duni kuliŋ baa laa keebaa kotoolu faŋo kaŋ ne.

⁷ I ko, ite le be ke la musumansoo ti fo fawu. Bari i maŋ i hakilitu ñiŋ to, i labaŋo be ke la ñaameŋ.

⁸ “Bituŋ saayiŋ, i lamoyi, kuu diimaa diyaata ite meŋ ye! I ye a miira ko i be tankoo le kono, i ka a fo i faŋo ye ko, ‘Nte doroŋ ne mu, doo koteŋ maŋ soto. N te ke la furuyaamusoo ti muumeeke, waraŋ ka n diŋolu saŋakumboo.’

⁹ Bari luŋ kiliŋ, ñaa biti niŋ ñaa yele kono, ñiŋ kuu fuloo be ke la le, i diŋolu bee be faa la le, i be ke la furuyaamusoo ti. I la batuutaalu niŋ saaboolu siyaata ñaa-wo-ñaa, ñiŋ kuwolu be laa la i kaŋ ne, ì te baayi la.

¹⁰ I laata i la kuruŋyaa la le, i ko, moo te i je la. I la ñaameŋo niŋ i la londoo le ye i filindi. I ka a fo i faŋ ye ko, ‘Nte doroŋ ne mu, doo koteŋ maŋ soto.’

¹¹ Kooroo be boyi la i kaŋ ne, aduŋ i te saaboo soto la meŋ be a bondi noo la. Maasiiboo be naa i kaŋ ne, i te meŋ baayi la noo. Kasaaroo ñaamootoo si naa, i te meŋ kalaŋo loŋ na.

¹² “Tenteŋ i la ñiŋ batuutaa kuwolu niŋ saaboolu la, i ye meŋ ke i la dookuwo ti biriŋ i dindiŋ! Tumandoo i be ñaatotaa soto la le, waraŋ i ye silaŋo dundi moo la.

¹³ I ye yaamarilaa jamaa le soto, i yaayita ì nooma fo i bataata. Lonnaalu mennu ka looloolu la kuwo koroosi, ka a fo le meŋ be ke la kari-wo-kari, wolu si naa i tanka maasiiboo la, meŋ be laa la i kaŋ.

¹⁴ Tooñaa-tooñaa, wolu ñaama jaaramaa le mu! Ì te ì faŋo tankandi noo la dimbaa la sembe waroo la. A maŋ ke dimbaa keñemboo ti ka i jaa, waraŋ dimbaa, i si sii meŋ daala.

¹⁵ Wo looloo lonnaalu mennu mu i kuukeñoolu ti biriŋ i dindiŋ, ì te feŋ ke noo la i ye. Ì be i tu la jee le, ì ye taa ì faŋ ye, moo te soto la ì kono meŋ si i tanka.”