Yesaya 31 - Mandinka Bible

Alla le be Yerusalaamu tankandi la

¹ Kooroo be boyi la moolu kaŋ ne, mennu ka taa maakoyiroo ñini Misira. Ì ka tara jikiriŋ wolu la suwoolu le la, aniŋ ka taamaayaa wolu la keleraŋ sareeti* jurumoolu la, aniŋ ì la suuborindilaa sembemaa baalu. Bari ì buka ì ñaa loo Banisirayila la Senuŋ Baa kaŋ, waraŋ ka maakoyiroo ñini Yaawe* bulu.

² Bari Yaawe le ñaamenta, a si maasiiboo naati. A ye meŋ fo, a buka a baayi. A be wuli la moo jawoolu kamma le, aniŋ moolu mennu ka kuu kuruŋ kelaalu maakoyi.

³ Misirankoolu mu hadamadiŋolu doroŋ ne ti, ì maŋ ke Alla ti, ì la suwoolu mu beeyaŋolu le ti, ì maŋ ke malaayika ti. Niŋ Yaawe ye a buloo teeka, maakoyirilaa be taki la le, a ka meŋ maakoyi, wo ye boyi, aduŋ ì bee be kasaara la ñoo la le.

⁴ Yaawe ye ñiŋ ne fo n ye ko: “Nte Yaawe Alihawaa Maariyo* be naa la le ka keloo ke Siyoni* Konkoo kaŋ. M be ke la le ko jatakee mendiŋo ka kuma ñaameŋ, niŋ a loota suboo kunto. Hani ì ye kantarilaa jurumoo le kumandi a kamma, a buka sila ì sari kaŋo la, waraŋ ì maakaŋo si a bondi a noo to.”

⁵ Yaawe Alihawaa Maariyo be Yerusalaamu kanta la le, ko kunoo ka yaara a la ñaŋo kunto ñaameŋ. A be saatewo kanta la le, a ye a tanka. A tambitoo be a bondi la mantooroo kono le.

⁶ Hee Banisirayilankoolu, ali muru Yaawe kaŋ, alitolu mennu ye jamfaa baa tiliŋ a la.

⁷ Aduŋ wo luŋo le mu, alitolu kiliŋ-wo-kiliŋ be ali la kodiforo jalaŋolu niŋ sani jalaŋolu fayi la, alitolu faŋolu ye mennu dadaa ali bulu junubemaalu la.

⁸ Hawusaroo* le be Asiriyankoolu faa la, meŋ te ke la hadamadiŋ hawusaroo ti, meŋ maŋ ke hadamadiŋ na teeka taa ti, wo le be ì kasaara la. Ì be a kata la ka bori ñiŋ hawusaroo la, bari ì la kelediŋolu be muta la le ka ke joŋolu ti.

⁹ Yaawe meŋ na batudulaa be Yerusalaamu, meŋ na sadaajanidulaa* be Siyoni, ye ñiŋ ne fo ko, Asiriya la kelediŋ bambandiŋolu ko konko beroo be bori la le silaŋo kamma. A la ñaatonkoolu be jikilateyi la le, ì ye bori ka ì la bandeeri dokoo tu jee.