Yesaya 15 - Mandinka Bible

Niikuyaa kumoo Mowabi ye

¹ Kiilaariyaa kumoo fele Mowabi la kuwo to. Ari meŋ be Mowabi, kasaarata le suuto kiliŋ! Kiri meŋ be Mowabi, kasaarata le suuto kiliŋ!

² Diboninkoolu taata ì la batudulaa to le, ì la batudulaa tintiŋolu* to ka woosii, Mowabinkoolu lembata Nebo niŋ Medeba la kuwo la. Ì ye ì kuŋolu bee nunku le, ì ye ì booraalu bee lii niikuyaa kamma.

³ Ì ka booto funtoolu le duŋ mbeedoolu kaŋ, ka taa bantabaalu to, aniŋ ì la buŋ santo teruriŋolu* kaŋ. Ì bee le ka wuuri, ì ye i fayi duuma ka kumboo.

⁴ Hesiboni niŋ Eleyale siilaalu wuurita, ì kaŋo moyita le fo Yahasi saatewo to, a ye a tinna Mowabi kelediŋolu ŋaarata fo ì korita.

⁵ Mowabi la kuwo ye m balafaa le. A la keleborilaalu borita le fo Sowari, ka taa fo Ekilati-Selisiya. Ì be lemba kaŋ ka taa Luhiti siloo la, ka taa Horonayimu, ì be ì la kasaaroo woosii kaŋ.

⁶ Nimurimu baajiyo jaata le, a ñaamoolu norota, fiifeŋolu bee faata, hani dulaa jambakereriŋ maŋ soto.

⁷ Ì ye ì la naafuloo meŋ kafu ñoo ma, ì ye a maabo le, ì ye a samba, ka a teyindi niŋ Nombo Wulumbaŋo la.

⁸ Ì la woosiyo ye Mowabi bankoo bee beŋ, ì la wuuroo futata fo Ekilayimu, ì la niikuyaa woosiyo, fo Beeri-Elimu.

⁹ Diboni baajiyo be faariŋ yeloo le la, bari m be doo kafu la Diboninkoolu ye le, jatoo, Mowabinkoolu la keleborilaalu ye, aniŋ mennu tuta bankoo kaŋ.