Yeremiya 5 - Mandinka Bible

Alla la moolu la faratoo

¹ Yaawe* ko: “Ali Yerusalaamu mbeedoolu muruŋ-muruŋ baŋ, ka juubeeroo ke, ali ye i miira. Ali ñinindiroo ke a bantabaalu to, fo ali be moo le je la meŋ ka taama tiliŋo kono, aniŋ ka foroyaa tooñaa kaŋ. Niŋ wo sotota, n si yamfa saatewo ye.

² Ì ka ñiŋ meŋ fo ko, ‘A be koyiriŋ ñaameŋ ko Yaawe be baluuriŋ ne,’ hani wo ì ka kali faniyaa kaŋ.”

³ Hee Yaawe, fo ite ñaa buka lafi tooñaa le je la baŋ? I ye ì busa le, bari a dimoo maŋ duŋ ì la. I ye ì kasaara le, hani wo ì balanta i la kuluuroo la. Ì ye ì sondomoolu jandi le ko beroo, ì balanta ka tuubiseyi.

⁴ Bituŋ n kumata m faŋ ma ko, “Ñinnu mu fuwaaroolu doroŋ ne ti, ì maŋ hakili soto, bayiri ì maŋ Yaawe la siloo loŋ, tiliŋo, ì la Alla ye meŋ kaniŋ.

⁵ Wo to m be taa ñaatonkoolu le yaa, ŋa diyaamu ì ye, bayiri itolu le ye Yaawe la siloo loŋ, tiliŋo, ì la Alla ye meŋ kaniŋ.” Bari ì bee le kafuriŋo ye a la yookoo* kati ka balaŋ a ma, ì ye i kuntu a la pat.

⁶ Wo kamma la jatoolu be bo la sutoo kono le ka ñapi ì kaŋ, suluwolu ye bo naŋ keñewuloo* kono ka ì kasaara. Soloolu be bitiriŋ ì la saatewolu kamma le, moo-wo-moo fintita banta, ì ye a faraŋ-faraŋ, kaatu ì la balaŋo warata le, ì la badali maañaalu siyaata.

⁷ Yaawe ko: “Nte si yamfa noo ite Yerusalaamu ma ñaadii? I diŋolu ye ì koo dii n na le, ì ka kali alloolu la mennu maŋ ke Alla ti. Nte le ye ì daañini fo ì konoo faata tep, ì naata jeenoo ke, ì ka jurumi caka buŋolu to taariŋ.

⁸ Ì mu suukee nunku jarabiriŋolu le ti, ì meŋ-wo-meŋ ka tara suu kuma la a siiñoo musu nooma.

⁹ Fo m maŋ ñaŋ na ì jarabi la ñiŋ kuwolu la baŋ? Fo m maŋ ñaŋ na juloo joo la ñiŋ banku siifaa to baŋ?” Yaawe le ye a fo.

¹⁰ A ko: “Ali i seyiŋ a wayini* yiri kankaŋolu kono ka ì kuntu, bari ali kana ì bee kasaara kewu. Ali a buloolu jasi, bayiri wo moolu maŋ ke nte Yaawe taa ti.

¹¹ Banisirayila niŋ Yahuuda jenketa n na karoo la le fereŋ.” Yaawe le ye a fo.

¹² “Ì ka nte Yaawe soosoo le. Ì ye ñiŋ ne fo ko, n te hani feŋ ne ke la. Kuu jawu te ke la ì la, sako ì si hawusaroo* je, waraŋ ka konko.

¹³ Annabiyomoolu la kumoo mu foño kenseŋ ne ti, n na kuma te ì daa. Wo to ì fokumoo be ke la ì faŋolu le la.”

¹⁴ Wo kamma la Yaawe Alihawaa Maariyo* ye ñiŋ ne fo ko: “Bayiri ì ka ñiŋ kumoo le fo, wo to m be n na kumoo ke la ite Yeremiya daa kono dimbaa le ti, ñiŋ moolu ye ke loo ti, a dimbaa ye ì domo.”

¹⁵ Yaawe ko: “Alitolu Banisirayilankoolu, m be jamfajaŋ banku le naati la ka ali boyinkaŋ, banku sembemaa, banku meeriŋ, ali maŋ banku meŋ na kaŋo moyi, sako ali si ì la diyaamoo fahaamu noo.

¹⁶ Ì la kalabeñe kufoolu mu kaburu dinkoo le ti, ì bee mu kelejawaroolu le ti.

¹⁷ Ì be i baluu la ali la siimaŋ katiriŋolu niŋ ali la domoroo le la, ì ye i baluu ali dinkewolu niŋ ali dimmusoolu la. Ì be i baluu la ali la saajiyolu, baalu, aniŋ ninsoolu le la, ì ye i baluu ali la wayini* yiroolu niŋ ali la sooto suŋolu la. Ali be jikiriŋ ali la saatee tatariŋolu mennu la, ì be ì kasaara la niŋ hawusaroo le la.”

¹⁸ Yaawe ko, “Bari hani wo luŋolu la, n te ì muumewo kasaara la.

¹⁹ Itolu moolu be i ñininkaa la le ko, ‘Muŋ ne ye a tinna Yaawe ǹ na Alla ye ñiŋ bee ke ǹ na?’ Bituŋ i si ì jaabi ko, bayiri ì ye ì koo dii nte la le ka bantala bankoolu* la alloolu batu ì faŋolu la bankoo kaŋ jaŋ, wo to ì be taa luntaŋolu le batu la banku kaŋ meŋ maŋ ke ì taa ti.”

²⁰ Yaawe ko: “Ñiŋ kibaari Yaakuba koomalankoolu ye, i ye a kankulaa Yahuuda kono ko:

²¹ Ali ali tuloo tu ñiŋ to, alitolu toolee hakilintaŋolu. Ñaa be ali la le, bari ali buka i je, tuloo be ali la, bari ali buka i moyi.

²² Muŋ ne ye a tinna ali buka sila n na? Muŋ ne ye a tinna ali buka jarajara n ñaatiliŋo la?” Yaawe le ye a fo. “Ŋa keñoo ke naanewo ti fankaasoo ye le, badaa-badaa kuntuntewo, a te tambi noo la meŋ na muk. Hani jii baliŋolu si busa, ì te kuu noo la, hani ì si bumbuŋ, ì te a salaŋ noo la.

²³ Bari ñiŋ moolu, ì mu balannaa jusu jaaroolu le ti. Ì yelemata le ka taa taariŋ.

²⁴ Ì buka ñiŋ miira ì sondomoolu kono ko, ‘M̀ batu ŋà sila Yaawe ǹ na Alla la, ate meŋ ka samaajiyo dii a waatoo la, samaa foloo jiyo, samaa labaŋ jiyo, ka katiri sanjaanoolu jikoo dii ǹ na.’ ”

²⁵ Yaawe tententa ka a fo ko: “Ali la kuu kuruŋ kewo le ye ali bali ñinnu la, ali la junuboolu, wolu le ye ñiŋ kuu kendoolu baayi ali ye.

²⁶ “Kuruŋolu sotota n na moolu kono le, ì ka biti le ko kunu mutalaa, ka jaloo laa ka moolu muta.

²⁷ Kunu mutalaa la keesoo ka faa kunoolu la ñaameŋ, ì ye ì la buŋolu fandi nakaroo kaŋ wo le ñaama, wo le ye ì ke fankamaalu ti ka naafulutiiyaa.

²⁸ Ì nunkuta le ka malamala, ì maŋ naanee loŋ kuu kuruŋ kewo to. Ì buka kiitiyo teyi aliyatiimoolu ye, ka ì la kuwo yiriwandi, sako ka loo fentaŋolu boloo ye.

²⁹ Fo m maŋ ñaŋ na ì jarabi la ñiŋ na baŋ? Fo m maŋ ñaŋ na juloo joo la ñiŋ banku siifaa to baŋ?” Yaawe le ye a fo.

³⁰ “Jaakali kuwo, aniŋ kuu saŋaroo, wo le keta bankoo kaŋ.

³¹ Annabiyomoolu ka faniyaa kumoolu le fo, piriisoolu* ka ì fansuŋ kaŋo le taamandi, aduŋ n na moolu ye wo le kanu. Bari ali be ke la ñaadii le kuwo labandulaa to?”