Yeremiya 45 - Mandinka Bible

Alla ye Baruku laahidi

¹ Yahuuda mansakewo Yehoyakimu, Yosiya dinkewo la mansayaa sanji naaninjaŋo la, nte Yeremiya diyaamuta Neriya dinkewo Baruku ye le. Wo keta le kabiriŋ Baruku ye kumoolu safee kitaabu moromororiŋo* kono fokabaŋ, ŋa mennu daalasaata a ye. N ko a ye le ko:

² Yaawe* Banisirayila la Alla ye ñiŋ ne fo ite Baruku ye ko:

³ “I ka ñiŋ ne fo ko, ‘Woyi nte! Yaawe ye niitooroo le lafaa n na dimiŋo kaŋ. M bataata ŋuntaŋo la le, m maŋ dahaa soto.’

⁴ “Bari nte Yaawe ye ñiŋ ne fo i ye ko: M faŋo ye meŋ loo, m be a boyindi la le, ŋa meŋ tutu, m be a suloo wutu la le, meŋ keta bankoo muumeelaa ti.

⁵ Wo to fo ite ñanta le ka kuwolu ñiniŋ i faŋo ye, mennu warata? Kana wolu ñiniŋ. Kaatu ko, m be kasaaroo le naati la moo bee kaŋ. Bari i taata daa-wo-daa, m be a je la le ko, i niyo, wo ye kana.” Yaawe le ye a fo.