Yeremiya 20 - Mandinka Bible

Yeremiya niŋ Pasihuri la waaliyo

¹ Silaŋ Pasihuri, Immeri dinkewo meŋ mu piriisoo* ti, aduŋ ate le mu Yaawe* Batudulaa Buŋo* topatoolaalu la kuntiyo ti, a ye a moyi ŋa kumoolu mennu bankee n na kiilaariyaa kono.

² Bituŋ a ye kaŋo dii ka n lipa, aniŋ ka m bula kutiŋo la Benjamini Dundaŋ Daa to, meŋ be tintoo kaŋ, Yaawe Batudulaa Buŋo to.

³ Wo saamoo, biriŋ Pasihuri ye m bondi kutiŋo la, n ko a ye ko, “Yaawe ye too meŋ dii i la, a maŋ ke Pasihuri ti, a ye i too ke Maasiiba Moo le ti, maasiiboo karoo bee la.

⁴ Kaatu Yaawe ye ñiŋ ne fo ko, a be i ke la maasiiba moo le ti i faŋo ye, aniŋ i teerimaalu bee ye. Ì jawoolu be ì faa la niŋ hawusaroo* le la keloo kono, i faŋo ñaa ye tara a la. A be Yahuuda moolu bee duŋ na Babiloni bankoo mansakewo bulu le. A be ì samba la mutamoolu le ti Babiloni bankoo kaŋ, aduŋ a be ì faa la niŋ hawusaroo le la.

⁵ A be ñiŋ Yerusalaamu saatewo naafuloo bee dii la ì jawoolu la le, ì la sotofeŋolu bee, ì la feŋ kummaalu, aniŋ Yahuuda mansoolu la kodiforoo niŋ sanoo bee. Ì be a ke la ñapinkaŋ feŋo le ti ka a samba Babiloni bankoo kaŋ.

⁶ Ite Pasihuri, aniŋ i la suukononkoolu bee le be taa mutoo kono Babiloni bankoo kaŋ. I be faa la jee le to, ì ye i baadee, i niŋ i teerimaalu bee, i ye faniyaa kumoolu fo mennu ye.”

Yeremiya woosiita Yaawe ye

⁷ Hee Yaawe, i ye n sondi le, aduŋ n sonta le. Ite le bambanta n ti, i ye n noo le. Ì ka n ke jelefeŋo le ti tiloo muumewo, moo bee ka n ñaawali.

⁸ Niŋ m be diyaamu la waati-wo-waati, fo n si wuuri, aniŋ ka sari ko, “Fitinoo! Kasaaroo!” Ite Yaawe la kumoo foo keta n ye jalayiroo niŋ jelefeŋyaa le ti luŋ-wo-luŋ.

⁹ Bari niŋ n kumata ko, n te i la kuma fo la kotenke, waraŋ ka diyaamu i tooyaa la, i la kumoo ka ke n jusoo kono le ko dimbaa, ko dimbaa meŋ be fo n jusoo kono. M bataata n deyi la a kaŋ ne, n te wo noo la faŋ.

¹⁰ N ka moo jamaa le moyi ŋunuŋunu la ko, “Maasiiboo le be karoo bee la! Ali taa a la kuwo dantee! Ali ŋà a la kuwo dantee maralilaalu ye!” Hani n teerimaalu bee le be koroosiroo la ka n na boyoo je. Ì ka a fo le ko, “Tumandoo a be a faŋ dundi la le, wo to le m̀ be n kutu la a la, ŋà ǹ na juloo joo a to.”

¹¹ Bari ite Yaawe be loo la n ye le ko kelejawaroo meŋ silaŋñaa warata. Wo to n toorandilaalu be boyi la le, ì te i kutu la n na. Ì be malu la baake le, kaatu ì te kututeyi la. Ì la maloo be tu la le fo abadaa, a te ke la ñina kuu ti.

¹² Hee Yaawe Alihawaa Maariyo*, i ka moo tilindiŋolu kotobo le, i ka sondomoo niŋ hakiloo kono je le. N jerindi julujoo la i be meŋ ke la ì la, kaatu ŋa n na kuwo tu ite le bulu.

¹³ Ali suukuwo laa Yaawe ye, ali ye a jayi! Kaatu a ye moo toorariŋolu niyo tankandi kuu jawu kelaalu bulu le.

¹⁴ Dankoo ye tara luŋo ye, luŋo meŋ nte wuluuta! M baamaa ye n wuluu luŋo meŋ na, Allamaa a kana ke luŋ barakariŋo ti.

¹⁵ Dankoo ye tara wo moo ye, meŋ ye a kibaaroo naati m faamaa ye ko, “I ye diŋo le soto, dinkee!” ka m faamaa kontaanindi.

¹⁶ Allamaa wo maarii ye ke ko Yaawe ye saatewolu mennu kasaara nuŋ, a maŋ balafaa ì ye. Allamaa a ye wuurikaŋo moyi soomandaa, aniŋ kele wuuroo, tilibuloo.

¹⁷ Bayiri a maŋ m faa wuluuñaŋo kono, m baa konoo ye ke n na kaburoo ti, a ye tu konomaayaa to fo abadaa.

¹⁸ Muŋ ne faŋo ye a tinna nte wuluuta, ka bataa niŋ niikuyaa taki, ka n siyo baŋ maloo kono?