Yeremiya 12 - Mandinka Bible

Yeremiya woosiita Yaawe ye

¹ Hee Yaawe*, ite le be boloo la, niŋ ŋa tuumiroo naati i kaŋ. Hani wo, m be n na kuwo laa la i ñaa koto le. Muŋ ne ye a tinna moo kuruŋolu ka yiriwaa? Muŋ ne ye a saabu moo jenkeriŋolu ka ñaatotaa soto?

² Ite le ye ì tutu ko yiroo, ì ye suloo duŋ. Ì ka faliŋ ne, ì ye diŋ. Ì ka tu i la kuwo fo la ì daa le la, a ye a tara ì sondomoo jamfata i la baake le.

³ Bari Yaawe, ite ye nte loŋ ne. I ñaa ka tara n na le, ka n sondomoo kotobo i la kuwo to. Wo moo kuruŋolu bondi banta ko ì ka taa saajiyolu mennu kanateyi, i ye ì jenkendi kara la ka ì kanateyi waatoo batu.

⁴ Ñiŋ bankoo be tara la jaariŋ fo janniŋ muŋ tuma, kenoolu bee ñaamoo ye tara nororiŋ? Moolu la kuruŋyaa kamma la, mennu be siiriŋ a kaŋ, daafeŋolu niŋ kunoolu bee le turutumbunta. Bayiri moolu ka a fo le ko, “A te a je la kuu ye ke ntolu la.”

Alla la jaabiroo

⁵ Yaawe ye jaabiroo ke ko: “Niŋ i niŋ moolu ye boroo ke, ì ye i korindi, i niŋ suwoolu si boroo ke noo baŋ? Niŋ i ka busandi kene fanuŋo to, silaŋ i be ke la sutoo kono ñaadii le Yoridani Boloŋ daala?

⁶ Hani i baadiŋolu niŋ i faa suwo moolu ye jamfaa taamandi i kaŋ ne. Ì ka maakaŋ baa le wulindi i kamma. Kana laa ì la, hani ì si kuma diimaalu fo i ye.”

⁷ Yaawe ko: “Ŋa n na dimbaayaa Banisirayila bula le, ŋa n koo dii m faŋo la tomboŋ moolu la. Ŋa mennu kanu n niyo la, ŋa ì duŋ ì jawoolu bulu le.

⁸ M faŋo la tomboŋ moolu keta n ye le komeŋ jatoo sutoo kono, ì ye ì kaŋo bula ka bumbuŋ n kaŋ. Wo kamma la ŋa ì koŋ ne.

⁹ N na tomboŋ moolu keta le komeŋ duwoo, duwa doolu ye meŋ kuru ka a ñapinkaŋ. Ali taa wulakono daafeŋolu bee kafu naŋ ñoo ma ka ì naati, ì ye a domo.

¹⁰ Kantarilaa jamaalu le ye n na wayini* yiri kankaŋo kasaara, ì ye n na kunkoo doriŋ-doriŋ. Ì ye n na kunku kendoo kenseŋyandi le ka a ke keñewuloo* ti.

¹¹ Ì ye a kenseŋyandi le, a kensemmaa be woosii kaŋ n ye. Bankoo bee le kenseŋyaata, moo maŋ a muta kuu ti.

¹² Kasaaralilaalu naata niŋ keñewula tintiñaalu bee le la. Nte Yaawe ye keloo le naati niŋ hawusaroo* la, ka bankoo kasaara biriŋ tonkoŋ fo tonkoŋ. Moo te kayira soto la.

¹³ Ì ye siimaŋo le fii, bari ì ye ŋaniŋo le kati. Ì ye ì faŋ faa dookuwo la le, bari a maŋ ì nafaa feŋ na. Ì maluta ì la katiroo to le, nte Yaawe la kamfaa baa kamma la.”

Yaawe ye laahidoo dii Banisirayila dandanna bankoolu la

¹⁴ Yaawe ye ñiŋ ne fo ko: “N na moolu Banisirayilankoolu dandanna bankoolu bee, mennu buloo laata keetaafeŋo kaŋ, ŋa meŋ dii ì la, wolu la kuwo fele: M be ì wutu la ì la bankoolu kaŋ ne, aduŋ m be Yahuuda moolu bondi la naŋ ì kono le.

¹⁵ Bari niŋ ŋa wo ke wo banku moolu la fokabaŋ, m be naa balafaa la ì ye le, ŋa ì murundi ì fansuŋ bankoolu kaŋ, meŋ-wo-meŋ a bota daameŋ to.

¹⁶ Misaali fee, niŋ a ye a tara ì ye n na moolu la siloo karaŋ a ñaama, ì ka kali n too la ka a fo ko, ‘A be koyiriŋ ñaameŋ ko Yaawe be baluuriŋ ne,’ ko itolu fanaa ye n na moolu karandi ñaameŋ ka kali Baali* jalaŋo too la, wo to ì be sabati la n na moolu kono le, ì ye firiŋ jee.

¹⁷ Bari niŋ banku meŋ maŋ wo muta, m be wo wutu la le ka a kasaara.” Yaawe le ye a fo.