Suukuwo 7 - Mandinka Bible

¹ N na mansariŋ musoo, i siŋo ñiiñaata i la samatoo kono ñaameŋ. I wutoo be muruŋ-murundiŋ ne ko bulutotaa, bulukalaŋ dookuulaa betoo ye meŋ dadaa.

² I batakuŋo be muruŋ-murundiŋ ne ko mindaŋ ñiimaa, meŋ nene maŋ foo wayini* betoo la. I konobatoo be le ko siimaŋ kese jurumoo, firi ñiimaalu ye a muru.

³ I sunju fuloo ka muluŋ ne ko minandiŋ fula.

⁴ I kaŋo be jaŋayaariŋ ko tatoo, ì ye meŋ ñarandi samañiŋo la. I ñaalu ka malamala ko Hesiboni daloolu, mennu be dundaŋ daa to, ì ka dundaŋ daa meŋ kili Bati-Rabimu la. I nunkaloo be looriŋ ne ko Libanooni tatoo, meŋ ñaa be tilindiŋ Damasiku la.

⁵ I kuŋo daañaa be ko Karimeli Konkoo, i kuntiñoo be findiŋ, a be malamalariŋ, a la ñiiñaa si hani mansa faŋo bondi noo a noo to le.

⁶ N kanuntewo, i ñiiñaata ñaameŋ, i timinaŋo diyaata, i la kuwo ye n jusoo laa le.

⁷ I be lookuuriŋ ne ko tamaree suŋo, i sunjoolu be ko a ñatoolu.

⁸ N ko m faŋ ye ko, m be ñiŋ tamaree suŋo sele la le, ŋa m miniŋ a ñatoolu la. Allamaa i sunjoolu ye ke ko wayini yiridiŋo, i niijii foñoo ye seera ko pomoo,

⁹ i la sumburoo ye ke ko wayini diimaa. Musoo ko: Ñiŋ wayinoo ye futa n kanuntewo ma, a ye bori naŋ a ñiŋo niŋ a daafaroo la.

¹⁰ M mu n jusukuŋo taa le ti, nte le mu a ŋaniyoo ti.

¹¹ N jusukuŋo naa, ŋà finti, ŋà taa kene koomoo to, ŋà suutoo laa fudani firoolu kono.

¹² Ŋà sori juuna yiri kankaŋo to, ka a juubee, fo wayini yiroolu be sorondiŋ ne, fo a firoolu be yele kaŋ ne, fo roomaani* yiroolu ye a dati le ka firi. Jee to, m be n na kanoo dii la i la le.

¹³ Mandarake firoolu be seera diimaa dii kaŋ, yiridiŋ diimaalu siifaa bee le be ǹ na bundaa to, biriŋ a kotoomaa fo a kutamaa, ŋa mennu maabo i ye, n jusukuŋo.