Suukuwo 5 - Mandinka Bible

¹ M baarimmusu, n na maañoo, m be naa kaŋ n na naakoo to le, ka n na miiri* niŋ seerandi feŋ koteŋolu kafu ñoo ma. M be n na liyo niŋ a kaañoo domo la le, ŋa n na wayinoo* niŋ n na keekewo miŋ. N teerimaalu, ali domoroo ke, ali ye i miŋ, ali ye siira kanoo kono. Musoo ko:

Suukuu naaninjaŋo

² M be siinoo kaŋ, bari n hakiloo maŋ tenkuŋ. I lamoyi baŋ, n jusukuŋo le be konkondiroo la. Kewo ko: M baarimmusu, n kanuntewo, bundaa yele n ye, n na puraariŋo, n na musu timmariŋo. N kuŋo bee sinanta tuutuwo la le, suuto komboo ye n kuntiñoo bee sinandi. Musoo ko:

³ Ŋa n wura le fokabaŋ, m maŋ paree ka n na feŋolu duŋ kotenke. Ŋa n siŋolu kuu le fokabaŋ, m maŋ paree ka ì nondi kotenke.

⁴ N jusukuŋo ye a buloo duŋ daahuwo la, a la kuwo loo ye m baloo bee futufaa.

⁵ N wulita wo le ñaama ka bundaa yele n jusukuŋo ye, miiri tuloo be suleŋ na m buloo la, karabaanijiyo be tondi la m bulukondiŋolu la, sorondaŋo kaŋ.

⁶ Ŋa daa yele n jusukuŋo ye, yaarafaŋ, a ye a koo dii le, a taata. A la taa ye n niyo fitii, ŋa a ñini, bari m maŋ a je, ŋa a kili, bari a maŋ n jinkaŋ.

⁷ N niŋ saatee kantalaalu benta, biriŋ ì be saatee muruŋ-muruŋo la, ì ye n lipa fo ì ye m barama. Ñiŋ saatee tata kantalaalu, ì ye n na bitiraŋ faanoo wafu n na, ì ye a samba.

⁸ Alitolu Yerusalaamu dimmusuriŋolu, ŋa ali daani, niŋ ali ye n jusukuŋo je, ali si a fo a ye ko, kanoo meeyaa ye n saasandi le. Musoolu ko:

⁹ Musoolu bee musu ñiimaa, i jusukuŋo fisiyaata kee doolu ti ñaadii le? A la kuwo tambita doolu la ñaadii le, fo i ka ǹ daani a la kuwo la teŋ? Musoo ko:

¹⁰ N jusukuŋo jaatoo kereyaata le, fo a ka malamala, a ñoŋo te kee wuliwuloolu kono.

¹¹ A ñaadaa ka malamala le ko saniforoo, a kuntiña kesoo bee be fooyaariŋ, a be findiŋ ko kemboo.

¹² A ñaakesoolu be koyiriŋ ne ko woyoo daala puraa, ko puraa meŋ ye i kuu keekewo kono, ì bee be kekuuriŋ.

¹³ A kaaraa be le ko bambewo, seerandi feŋolu ka faliŋ daameŋ. A daaturoo be ko firi ñiimaa, a bee be sinandiŋ miiri tuloo la.

¹⁴ A buloolu be le ko sani mulumuloo, ì bee be ñarariŋ luuluwo la. A sisoo be deerariŋ ko samañiŋo, ì ye meŋ ñarandi safiiri beroolu la.

¹⁵ A siŋolu be le ko bere samasiŋ ñiimaa, meŋ be looriŋ sani looraŋo kaŋ. A alihaaloo be le ko Libanooni Konkoo, a be bambandiŋ ko sedari* yiroo.

¹⁶ A daakumoo diyaata, a la kuwo bee le ye n ñaabo. Yerusalaamu dimmusuriŋolu, n jusukuŋo be teŋ ne, ate le mu n teerimaa ti.