Suukuwo 4 - Mandinka Bible

¹ N kanuntewo, i ñiiñaata ñaameŋ, i ñiiñaabaata le. I ñaa be le ko puraa ñaa, i la kuŋ bitiraŋo koto. I kuntiñoo be le ko niŋ baa koorewo niŋ boroo be Kileyadi Konkoo jii kaŋ.

² I ñiŋolu be koyiriŋ ne ko perekaanoo, ì bee be temberiŋ i daa kono, hani kiliŋ maŋ dasa.

³ I daaturoo la wulewo ñiiñaata ñaameŋ, i daa be kekuuriŋ. I kenteŋo ka muluŋ ne ko roomaani* yiridiŋ talantewo i la kuŋ bitiraŋo koto.

⁴ I kaŋo be jaŋayaariŋ ko Dawuda la tatoo, i kaŋ nomboolu be jonkiriŋ ñoo kaŋ. Kantotaalu be ñatariŋ a bala, ì bee be ñiiñaariŋ ko kelejawaroolu la koteeroo*.

⁵ I sunjoolu be looriŋ ne pet, ì be ñiiñaariŋ ko minandiŋ fula be daañinoo la firi ñiimaalu kono.

⁶ Janniŋ fanoo ka ke, janniŋ diboo ka yeemaŋ, m be taa wo konko fuloo to le, miiri* seeralaa be daameŋ, aniŋ cuuraayoo.

⁷ N kanuntewo, i dulaa bee le ñiiñaata, feŋ maŋ dasa i bala.

⁸ N na maañoo, bo naŋ Libanooni, i ye naa n kaŋ. Bo naŋ Libanooni konkoolu to, i ye naa n kaŋ. Jii naŋ Amana Konkoo turoo to, jii naŋ Seniri niŋ Herimoni* Konkoolu to. Bo jatoolu la koloolu to, bo naŋ ñunkoolu to, soloolu be daameŋ.

⁹ M baarimmusu, i la kuwo futata n jusukuŋo to le. N na maañoo, i ñaa la ŋolosiri kiliŋ, i la kanto konoŋ julu kiliŋ, wo le ye n jusoo futufaa kanoo la.

¹⁰ M baarimmusu, i la kanoo diyaata ñaameŋ! N na maañoo, i la kanoo le diyaata wayinoo* ti. I la tuloo seeroo le diyaata seerandi feŋ koteŋolu bee ti.

¹¹ N na maañoo, i daaturoo be le ko liyo, i neŋo be timiyaariŋ ko liyo niŋ keekewo, i la sitifeŋolu ka seera ko Libanooni yiroolu.

¹² N na maañoo, n kanumusoo, i be le ko naakoo, meŋ daa be sorondiŋ, ko ñaapuuloo meŋ be sukiriŋ.

¹³ I mu naakoo le ti, roomaani* yiroolu ka faliŋ daameŋ, ì niŋ ì diŋ diimaalu. Fudani firoolu niŋ fiifeŋ seeralaalu buka foo jee,

¹⁴ safurani firoo niŋ ñaamandiŋ seeralaalu, sinnamoni yiroo aniŋ cuuraayi yiri siifaa-wo-siifaa, miiri aniŋ alowe yiroolu, ka taa seerandi feŋ betoo siifaa bee.

¹⁵ I mu woyoo le ti naakoo kono, i mu koloŋo le ti, kolondiŋ jii diimaa, ko woyoo meŋ jiyo ka woyi naŋ ka bo Libanooni. Musoo ko:

¹⁶ Foño, wuli naŋ maraa karoo la, foño, wuli naŋ bulubaa karoo la, ali fee naŋ n na naakoo kono, seerandi feŋolu seeroo ye janjaŋ. N kanuntewo ye naa a la naakoo kono, a ye a yiridiŋ betoolu domo.