Suukuwo 3 - Mandinka Bible

¹ M be laariŋ n na laaraŋo kaŋ suutoo, ŋa moomooroo ke ka n kanuntewo ñini, n niyo ye meŋ kanu, ŋa a ñini, bari m maŋ a je.

² N ko m faŋ ye ko, “M be wuli la le saayiŋ, ŋa saatewo yaayi, mbeedoolu kaŋ, aniŋ bendulaalu to taariŋ, ka n kanuntewo ñini.” Ŋa a ñini, bari m maŋ a je.

³ N niŋ saatee kantalaalu benta, biriŋ ì be saatee muruŋ-muruŋo la, ŋa ì ñininkaa ko, “Ali maŋ n kanuntewo je n ye baŋ?”

⁴ N tambita itolu la doroŋ, ŋa n kanuntewo je, n niyo ye meŋ kanu. Ŋa m miniŋ a la, m maŋ soŋ a ye taa, fo janniŋ m be a samba la m baa la buŋo kono, ka a dundi buŋo kono, m faŋo wuluuta daameŋ.

⁵ Alitolu Yerusalaamu dimmusuriŋolu, ali i kali n ye wulakono minaŋo too la, waraŋ daakoyoo, niŋ n niŋ n jusukuŋo be fereriŋ ka ǹ na kanoo yita ñoo la, moo kana futa m̀ ma, waraŋ ka m̀ batandi, fo janniŋ m̀ be kaañaŋ na. Musoo ko:

Suukuu sabanjaŋo

⁶ Muŋ ne ka naa teŋ, ka bo naŋ keñewuloo* kono, ko siisii samasimmaa? A ka seera ko miiri* aniŋ cuuraayoo, ko juloolu la seerandi feŋ munkumaalu.

⁷ A fele, Sulemani sambaraŋ siiraŋo le mu, Kelelaa baa taŋ wooro le be a dandaŋo la, Banisirayila kelejawaroolu.

⁸ Ì bee niŋ hawusaroo*, aduŋ kelelaa baalu le mu ì ti, moo-wo-moo la hawusaroo be a kara la, suutoo fankanta kamma.

⁹ Mansa Sulemani ye sambaraŋo le dadaa a faŋo ye, ì ye a dadaa Libanooni babaroo le la.

¹⁰ Ì ye a dokoolu muuri kodiforoo le la, ì ye a koomoo muuri sanoo la, a siidulaa kulooroo keta wuluyeloo le ti, Yerusalaamu dimmusuriŋolu niŋ kanoo le ye a konoto ñarandi.

¹¹ Siyoni* dimmusuriŋolu, ali finti naŋ, ali Mansa Sulemani juubee baŋ, ali mansanaafoo juubee, a baamaa ye a ñarandi meŋ na a la futuu luŋo, luŋ ne mu, a jusoo laata meŋ na.