Sefaniya 3 - Mandinka Bible

Yerusalaamu la kuu kuruŋolu

¹ Kooroo be moo toorandilaalu la saatewo ye, balaŋo niŋ kuruŋyaa saatewo.

² Saatewo meŋ, a buka yaamari muta, dandalaaroo, a buka wo moyi, a maŋ a jikoo loo Yaawe* kaŋ, a maŋ soŋ ka a ñaa tiliŋ Alla la.

³ Ñaatonkoolu mennu be jee, ì ka muluŋ ne ko jata bumbunnaa, a kiitiikuntulaalu ka muluŋ ko suluu konkoriŋo, ì be hadumeriŋ, ì buka hani kulu jaaroo faŋo le tu, wulaaroo niŋ soomandaa teema.

⁴ A annabiyomoolu ka kibiri, ì be jamfantuŋyaariŋ. A piriisoolu* ye Alla la feŋ buuñaariŋo dooyaa, ì ye Alla la yaamaroolu faliŋ.

⁵ Bari Yaawe meŋ ka tara Yerusalaamu saatewo kono, wo tilinta le, tilimbaliyaa, a buka wo ke. A ka a la kiitiyo siloo yitandi le soomandaa-wo-soomandaa, luŋ buka baayi. Bari moo kuruŋo maŋ a loŋ meŋ mu malu kuwo ti.

⁶ Yaawe kumata ko: “Ŋa bankoolu kasaara, ì la tatoolu tumbunta, ŋa ì la siloolu kenseŋyandi, moo buka taama ì kaŋ. Ì la saatewolu kasaarata, moo te tara la ì kono, hani moo kiliŋ.

⁷ N laata ñiŋ na le ko, ite Yerusalaamu be n kuliyaa la le, i ye soŋ ka i tilindi siloo la. Niŋ wo keta, n te i la moolu la sabatidulaa kasaara la, aduŋ ŋa jaraboo meŋ landi i kamma, a te boyi la i kaŋ. Bari hani saayiŋ i la moolu be hameriŋ ne doroŋ, ka taama niŋ jenkoo la ì la baara kuwolu bee to.”

⁸ Wo kamma la, Yaawe ye ñiŋ ne fo, a ko: “Ali i lamoyi m ma, fo janniŋ luŋo meŋ m faŋo be wuli la ka ke bankoolu la kuwolu tuumilaa ti. M pareeta le ka bankoolu bendi ñoo kaŋ, ka mansamarali bankoolu kafu ñoo ma, ŋa n na jaraboo jiyo jindi naŋ ì kaŋ, n na kamfaa baa. Duniyaa bee ye kasaara, n na kamfaa dimbaa la.”

Laahidoolu meŋ diita bankoolu la, sako Banisirayila

⁹ “M be bankoolu moolu neŋo faliŋ na le, ì kali kuma betoo fo, fo ì bee si kali nte Yaawe too kumandi, ì ye m batu ŋaniya kiliŋ na.

¹⁰ M batulaalu, n na moolu mennu be janjandiŋ be sadaalu* samba la n ye naŋ ne, ka bo naŋ biriŋ Kusi* boloŋolu ye kooma la.

¹¹ Ñiŋ luŋo la, malu kuu te laa la ali kaŋ kotenke, ali ye kuu kuruŋolu mennu tiliŋ n na nuŋ, ka balaŋ m ma. Bari m be kufantoolu niŋ faŋ wara moolu bee bondi la ali kono le. Moo te a faŋ wara la n na konko senuŋo* kaŋ kotenke.

¹² M be moolu mennu tu la ali kono Yerusalaamu, wolu mu fammajiilaalu le ti, aniŋ moo bataariŋolu. Ì be kali tankoo ñini la niŋ nte Yaawe too le la.

¹³ Moolu mennu be tu la Banisirayila kono, wolu te kuu jawu ke la, ì te faniyaa fo la, aduŋ tapaleeyaa neŋ te tara la ì daa. Ì si domoroo ke ì ye i laa, aduŋ moo te ì silandi noo la.”

Niiseewoo denkiloo

¹⁴ Dimmusuriŋ* Siyoni*, denkiloo laa, Banisirayila, sari santo. Dimmusuriŋ Yerusalaamu, kontaani i ye i faŋ niyo seewondi.

¹⁵ Yaawe ye i la jaraboo sika i kaŋ ne, a ye i jawoolu bayi. Yaawe, Banisirayila la Mansa be i fee le, i te sila la bataa kuu la kotenke.

¹⁶ Wo luŋo la a si fo Yerusalaamunkoolu ye ko, “Ali kana sila, alitolu Siyoninkoolu, ali kana jikilateyi.

¹⁷ Yaawe, ali la Alla be ali fee le. Ate le mu kelejawaroo ti meŋ ka nooroo ke. A be seewoo la ali la kuwo la le. A la kanoo ali kaŋ, wo be dahaa le dii la ali la, a ye ali la kuwo denkili seewoo kamma la.”

¹⁸ Yaawe ye ñiŋ ne fo ko: “Ali la moolu mennu tarata niikuyaa kono, ì buka maabee noo diina juuraloolu to, m be ì murundi la naŋ ali kaŋ ne. Malu kuwo te laa la ì kaŋ kotenke.

¹⁹ Ñiŋ waatoo la, n niŋ moolu le be maa la ñoo la, mennu ye ali toorandi. M be lanjuurutoolu tanka la le, ŋa moolu kafu ñoo ma mennu be janjandiŋ. M be horomoo niŋ buuñaa dii la ì la le, bankoolu kaŋ ì ye ì malundi mennu bee to.

²⁰ Ñiŋ waatoo la, m be ali kafu la ñoo ma le, ŋa ali samba naŋ suwo kono. M be buuñaa niŋ horomoo dii la ali la le, duniyaa moolu bee kono, ŋa ali la neemoo murundi ali kaŋ ali faŋolu ñaatiliŋo la.” Yaawe le ye a fo.