Kuma Kotoomaalu 7 - Mandinka Bible

Dandalaaroo musu jeenelaa la kuwo to

¹ N diŋo, m fokumoolu muta, aduŋ i ye n na yaamaroolu tu i kono.

² N na yaamaroolu tu i sondomoo kono, wo to le i si baluu, n na karandiroo kanta ko i ka i ñaakesoo kanta ñaameŋ.

³ Ì ke ñaroo ti i bulukondiŋolu ye, i ye ì safee i sondomoo bala.

⁴ A fo ñaameŋo ye ko, “Ite le mu m baarimmusoo ti.” I ye fahaamuroo ke i baadiŋo ti.

⁵ Ì be i tankandi la musu jeenelaa ma le, aniŋ musu tulunnaa meŋ na kumoo ka neeneeroo ke.

⁶ N na buŋo palanteeroo bala, ŋa yoofiiroo ke niŋ palanteeri huwo la,

⁷ ŋa moolu je mennu maŋ kalamutari ke, wo moolu kono, ŋa fondinkewo je, meŋ mu hakilintaŋo ti.

⁸ A ka taa niŋ mbeedoo tonkoŋo maafaŋo le la, jeenelaa la buŋo be daameŋ to,

⁹ wulaara maafaŋo, niŋ tiloo pareeta boyi la, aniŋ diboo be duŋ kaŋ suutoo.

¹⁰ Bituŋ musoo naata finti a kaŋ, a ye i paree komeŋ cakoo, a niŋ a la feere jawoo.

¹¹ Ñiŋ musoo maakaŋo be warariŋ, a maloo be dooyaariŋ, a buka sabati suwo kono,

¹² mbeedoolu kaŋ niŋ bantabaalu to, tonkoŋ-wo-tonkoŋ a si tara jee.

¹³ Kabiriŋ ñiŋ musoo ye fondinkewo je, a ye a muta, a ye a sumbu, a malubalimaa ko a ye ko,

¹⁴ “Ŋa sadaa* bo le, subu jamaa le be suwo kono, kaatu bii ŋa n na kaloo timmandi le.

¹⁵ Bituŋ n naata ka i benduŋ. Ŋa i ñini le, saayiŋ ŋa i je le.

¹⁶ Ŋa n na laaraŋo feenee, laaraŋ kaŋ faani ñiimaa le la, meŋ bota Misira.

¹⁷ Ŋa n na laaraŋo seerandi niŋ miiri* munkoo la, alowe munkoo, aniŋ sinnamoni munkoo.

¹⁸ Naa, ŋà kanoo diyandi fo fanoo ye ke. Ŋà m̀ faŋolu niyolu seewondi kanoo la karoo la.

¹⁹ N keemaa maŋ tara suwo kono, a taata taama jaŋ ne la.

²⁰ A ye a la kalipewo fandi kodoo la le, aduŋ a te seyi la naŋ fo kari maloo.”

²¹ Neeneeri kumoolu, a ka a filindi niŋ wolu le la, aniŋ ka a marisa kuma diyaariŋo la.

²² Kataba kiliŋ a si bula a nooma, komeŋ niŋ ninsituuraa ka taa kanateyi dulaa to, komeŋ minaŋo meŋ ye a faŋo duŋ suruntoo daa,

²³ fo niŋ kalabeñe fayilaa ye a jusoo soo, komeŋ kunoo meŋ ka taa duŋ kutindiŋo daa, a maŋ a loŋ ko, wo le be a kasaara la.

²⁴ Wo to saayiŋ, n diŋolu, ali i lamoyi n na, ali ye ali hakiloo tu n na kumakaŋolu to.

²⁵ Ali kana bula ñiŋ musoo la kuwolu kono, waraŋ ka taama niŋ a la siloolu la.

²⁶ Moo jamaa be jee le, mennu bulata a la mantooroo kono, aduŋ a ye moolu mennu fondi ì niyo la, ì siyaata le.

²⁷ A la buŋo mu saayaa dinkiraa le ti, aduŋ a ka ì samba kaburoo le kono.