Kuma Kotoomaalu 5 - Mandinka Bible

Dandalaaroo jeenoo la kuwo to

¹ N diŋo, i tuloo loo n na ñaameŋ kumoolu la, i ye i lamoyi n na kuma sahariŋo la kendeke,

² fo i si tenteŋ ka i kekuwo loŋ, ka londoo soto i fokumoolu to.

³ Kaatu musu jeenelaa daakumoo ka diyaa le komeŋ liyo, aduŋ a la kumoo ka tara tenkundiŋ ne komeŋ tuloo,

⁴ bari labaŋo la, a ka kuniyaa le ko kunaŋ-kunaŋo, a daa ka diyaa komeŋ hawusari* daa fuloo.

⁵ A siŋo ka taa saayaa le kaŋ, a la simfaalu ka tiliŋ kaburoo le kono.

⁶ A buka a hakiloo tu baluwo sila kendoo to, aduŋ a la siloolu jenketa le, bari a maŋ a loŋ.

⁷ Bituŋ saayiŋ, n diŋo, i lamoyi n na, kana i koo dii n na kumoo la.

⁸ I la siloo jamfandi a la, aduŋ kana sutiyaa a la bundaa la.

⁹ Niŋ wo nte, i be i la buuñaa dii la moo doolu le la, i siyo si tara moo bulu, meŋ maŋ balafaa soto.

¹⁰ Luntaŋolu si ì niyo domo i la naafuloo to, aduŋ i la sotofeŋolu si moo koteŋ na buŋo fankandi.

¹¹ Niŋ i kotoota, i si ŋuntaŋ. Niŋ i maŋ semboo soto kotenke,

¹² i si a fo ko, “Hee, ŋa kuluuroo koŋ ñaameŋ, n sondomoo ye a ñaa kaasi yitandiroo la.

¹³ M maŋ n na karandirilaalu horoma, waraŋ ka n lamoyi n na yaamarilaalu la.

¹⁴ M futata maloo dandulaa to moolu bee ñaa la.”

I tiliŋ i la musoo ye

¹⁵ Jii diimaa bii i faŋo la koloŋo to, i ye i miŋ i faŋo la jiibindaa to.

¹⁶ Fo i la woyoolu ñanta janjaŋ na mbeedoolu kono le, waraŋ i la bolondiŋolu ye tara woyiriŋ bantabaalu to?

¹⁷ Ì ñanta ke la i dammaa le taa ti, kana soŋ i niŋ luntaŋolu ye deŋ ì la.

¹⁸ Allamaa i la musoo ke la jiidilaa ti, i ye seewoo soto i fansuŋ musoo la karoo la,

¹⁹ kanumusoo, musu ñiimaa. Allamaa waati-wo-waati i ye i diyaŋñe futuwo soto a la karoo la. Allamaa waati-wo-waati a la kanoo ye tara i sondomoo kono.

²⁰ N diŋo, muŋ ne ye a tinna, i be musu jeenelaa la kanoo muta la i sondomoo kono? Muŋ ne ye a tinna, i niŋ wandi musoo be kanoo diyandi la?

²¹ Yaawe* ye hadamadiŋo taañaa bee loŋ ne, aduŋ a ka a la siloolu bee koroosi le.

²² Moo kuruŋo la kuu jawu kewolu le ka ke a ye kutindiŋo ti, a faŋo la junuboo le ka bataa kuwo saabu a ye.

²³ Faŋ mutabaliyaa le be a faa la, aniŋ a faŋo la kuntaŋyaa maañaa.