Kuma Kotoomaalu 4 - Mandinka Bible

Ñaameŋo nafaa

¹ Dindiŋolu, ali i lamoyi ali faamaa la yaamaroo la, ali si ali hakilitu, fo ali si a fahaamu kendeke.

² Ŋa karandiri betoo le dii ali la, wo to ali kana n na yaamaroo tu jee.

³ Kabiriŋ n keta kambaanendiŋo ti m faamaa la buŋo kono, m be dindiŋyaariŋ, aduŋ nte dammaa le mu m baamaa diŋo ti,

⁴ m faamaa ka n karandi le, a ka a fo n ye ko, “N na kumoo muta i sondomoo kono, i ye n na yaamaroo nooma, wo le be i balundi la.

⁵ Ñaameŋo niŋ fahaamuroo ñini, kana ñina n na kumoolu la, waraŋ ka i koo dii ì la.

⁶ Kana ñaameŋo bula jee, a be i tankandi la le, a kanu, wo to le a be i kanta la.

⁷ Ñaameŋo kummaayaata le, wo to ñaameŋo ñini, i be kuu-wo-kuu to, fahaamuroo ñini.

⁸ A buuñaa kendeke, wo to le a be i sikandi la. A muta i bulu fuloo la, a si naa horomoo dii i la.

⁹ A be ñara ñiimaa le ke la i kuŋo bala, aniŋ sani naafa ñiimaa.”

Yaamaroo ka bula sila kendoo nooma

¹⁰ N diŋo, i lamoyi n na, aduŋ i si n na kumoolu muta, fo i la baluwo kono, i si siimaayaa soto.

¹¹ Ŋa i karandi ñaameŋo siloo la le, aduŋ ŋa i tilindi sila kendoo le kaŋ.

¹² Niŋ i taamata, feŋ te tara la i siŋolu ñaato, aduŋ niŋ i borita, i te taki la.

¹³ Kana soŋ yaamaroo ye kana i ma, a kanta, kaatu ate le mu i la baluwo ti.

¹⁴ Kana duŋ moo kuruŋolu la kuwolu kono, aduŋ kana taama niŋ kuu jawu kelaalu la siloolu la.

¹⁵ Kana soŋ ì la, i kana duŋ ì kono, i ñaa kaasi ì la, i ye tenteŋ i la siloo la.

¹⁶ Kaatu ì buka siinoo noo, fo niŋ ì ye kuu kuruŋo ke. Siinoo ka ì korindi le, bari fo ì ye moo toorandi foloo.

¹⁷ Bayiri jawuyaa ka munta ì fee le ko domoroo, fitinoo ko miŋ feŋo.

¹⁸ Moo tilindiŋo la siloo ka fanu le ko siilimboo meŋ ka fanu-fanu laalaa tiloo muumewo la.

¹⁹ Bari moo kuruŋolu la siloo ka munta le ko dibi baa, ì buka a loŋ ì ka taki mennu la.

²⁰ N diŋo, i tuloo loo m fokumoolu la, i ye i hakiloo tu ì to.

²¹ Kana soŋ ì ye bo i la karoo la, ì maabo i sondomoo kono,

²² kaatu mennu ka ì ñini, a ka ke ì ye siimaayaa le ti, aniŋ jaatikendeyaa, hadamadiŋo balajaatoo muumee bee ye.

²³ I sondomoo kanta ka tambi feŋo bee la, bayiri ate le mu duniyaa sambaraŋo ti.

²⁴ Kana kuma jawoo fo moo ma, aduŋ i kana faniyaa fo.

²⁵ I si tara tilindiŋ tooñaa la, kana soŋ a ye bo i la karoo la.

²⁶ Tara sila tilindiŋo kaŋ, i la hame kuwolu si naa sooneeyaa.

²⁷ Kana jenke bulubaa waraŋ maraa la, i faŋo tankandi kuu kuruŋo ma.