Kawandilaa 6 - Mandinka Bible

Fankoo buka lafinna kuwo bee jaara noo

¹ Ŋa kuu dimindiŋo le je ñiŋ duniyaa tiloo koto, aduŋ a be laariŋ baake hadamadiŋo le kaŋ:

² Alla ye fankoo dii hadamadiŋ doo la, sotoo, aniŋ horomoo, a maŋ a fondi feŋ na a ye meŋ ŋaniya a faŋ ye. Bari Alla maŋ naa a mantaabendi ka niiseewoo soto ñiŋ feŋolu to. Moo koteŋ ne ka naa a faŋ seewondi ñiŋ feŋolu la. Nafaa te a la, aduŋ kuu dimindiŋo le mu.

³ Moo si diŋ keme soto noo, a ye siimaayaa. Bari a siyo si jamfa ñaa-wo-ñaa, niŋ a maŋ niiseewoo soto a la sotofeŋolu to, waraŋ a faata, a maŋ baadee, nte ko deenaani siibaloo le ye fisa a ti.

⁴ Deenaani siibaloo la naa maŋ nafaa soto, kaatu a faariŋo le ka naa, a ye taa diboo kono, aduŋ a too ka yeemaŋ wo diboo le kono.

⁵ A nene maŋ baluwo nene ñiŋ duniyaa tiloo koto, bari hani wo, ate le ye dahaa soto wo fankamaa ti.

⁶ Hani niŋ a ye a tara ñiŋ kewo ye sanji wuli fula le baluu, hani wo bee a maŋ niiseewoo soto. Fo ì bee labaŋo te ke la kiliŋ ne ti, kaburoo kono?

⁷ Hadamadiŋo la kata kuwo bee ka tara a konoo le ye, bari hani wo, a buka wasa noo.

⁸ Moo ñaamendiŋo be toolewo ñaato muŋ ne la? Fuwaaroo la maakuu moo kaŋ, a ye muŋ nafaa le soto a ye?

⁹ Ka i ñaa loo feŋo kaŋ meŋ be i fee, wo le fisiyaata ka tara bori kaŋ, hame kuwo nooma doroŋ. Ñiŋ fanaa maŋ ke feŋ ti, a ka munta le ko foño bayindoo.

Hadamadiŋo la londoo ye dandulaa le soto

¹⁰ Feŋ-wo-feŋ be sotoriŋ, too le diita a la, aduŋ hadamadiŋo mu meŋ ti, wo be londiŋ ne. Meŋ semboo warata i ti, i niŋ wo buka ñoo saba noo.

¹¹ Daa be siyaa la doroŋ, a kuma kenseŋo be siyaa la, a ye muŋ nafaa le soto moo ye?

¹² Jumaa le ka a loŋ, meŋ beteyaata hadamadiŋo ye, a baluu tili dantaŋ nafantaŋo kono, meŋ ka tambi ko niiniyo? Jumaa le ka a fo noo meŋ be naa ke la ñiŋ duniyaa tiloo koto, ate faariŋ koolaa?