Jabuuroolu 94 - Mandinka Bible

Alla le mu Kiitiiteyilaa ti

¹ Hee Yaawe* Alla, ite le mu julujoolaa ti, ite Alla le mu julujoolaa ti. I semboo yitandi baŋ!

² Wuli! Ite duniyaa moo bee Kiitindilaa, i ye faŋ wara moolu joo ì la baaroolu la.

³ Hee Yaawe, janniŋ muŋ tuma le mu moo kuruŋolu be tara la seewooriŋ? Yaawe, janniŋ muŋ tuma?

⁴ Kuu jawu kelaalu ka tu nendiri kumoolu le feenee la, aduŋ ì ye meŋ ke, ì ka kibiri a la le.

⁵ Hee Yaawe, ì ka i la moolu ŋayibe le, i fansuŋ moolu ì ka wolu le mantoora.

⁶ Ì ka furuyaamusoolu niŋ aliyatiimoolu faa le, aniŋ ka tumarankewolu niyo bo,

⁷ aduŋ ì ka a fo le ko, “Yaawe te a loŋ na, Yaakuba koomalankoolu la Alla te a kalamuta la.”

⁸ Alitolu mennu keta moo bee hakilintaŋo ti, ali ali hakilitu. Toolewolu, muŋ tuma le ali be ñaameŋ na?

⁹ Alla meŋ ye tuloo daa, fo a buka moyiroo ke baŋ? Meŋ ye ñaa daa, fo a buka jeroo ke baŋ?

¹⁰ Ate meŋ ka bantala banku* moolu jarabi, fo a te alitolu jarabi la baŋ? Ate meŋ ka londoo dii, fo a maŋ londoo soto baŋ?

¹¹ Yaawe ye hadamadiŋolu la miiroo loŋ ne, a ye a loŋ ne ko ì la miiroolu mu kenseŋ ne ti.

¹² Barakoo be moo le ye ite Yaawe ka meŋ kuluu, aniŋ i ka meŋ karandi i la luwaa la.

¹³ Ite le ka dahaa dii a la ka a la mantoora kuwolu daŋ, fo tuma meŋ na i be moo kuruŋolu kaburu luŋo sindi la.

¹⁴ Yaawe te a koo dii la a la moolu la. A te i bo la a fansuŋ moolu to.

¹⁵ Tiliŋo be muru la le a ye tara moolu kono, mennu bee tilinta, ì be bula la wo le nooma.

¹⁶ Jumaa le ka loo nte ye moo kuruŋolu kamma? Jumaa le ka loo m fee kuu jawu kelaalu kamma?

¹⁷ Niŋ Yaawe le maŋ ke nuŋ m maakoyilaa ti, tennuŋ m banta taa kaburoo kono yem.

¹⁸ N kumata le ko, nte boyitoo le mu. Bari Yaawe, i la kanu bambaloo kaŋ, i ye i buloo duŋ n koto le.

¹⁹ Niŋ n sondomoo miiroolu siyaata, ite le ka n sabarindi aniŋ ka n jusulandi.

²⁰ Fo kiitindirilaa kuruŋolu niŋ ite si teeriyaa noo baŋ, wolu mennu ka kuu tilimbaloo ke luwaa tooyaa la?

²¹ Ì ka tafawu moo tilindiŋolu niyo kamma le, ì ka moolu kiitindi ka ì faa, mennu maŋ kuu ke.

²² Bari Yaawe le mu nte la tankoo ti ko tatoo, n na Alla le mu n na semberaŋ beroo ti, n ka n dende meŋ na.

²³ A be ì joo la ì la kuu jawu kewo la le, a ye ì kasaara ì la junuboolu kamma la. Yaawe n na Alla be ì kasaara la le.