Jabuuroolu 91 - Mandinka Bible

Tankoo ka soto Alla le bulu

¹ Moo-wo-moo be sabatiriŋ Alla Sembetii Baa la suturoo kono, aduŋ a tarata Alla Tallaa la tankoo kono,

² wo si a fo noo Yaawe* ye le ko, “Ite le mu n ye tankadulaa ti, aduŋ i mu n ye tatoo le ti. Ite le mu n na Alla ti, ŋa n jikoo sembe meŋ na.”

³ A be i tanka la jawoo la kutindiŋo ma le, aniŋ alibalaa jawoo.

⁴ A be a la tankoo dampammaa le wanka la i kunto, aduŋ i be tankoo soto la wo dampaŋo koto le. A la tiliŋo kaŋ, a be i tanka la le ka i sansaŋ.

⁵ I te sila la suuto kuu jawu la, waraŋ tilibula boyinkaŋolu,

⁶ waraŋ alibalaa meŋ ka boyi diboo la, waraŋ kuuraŋ jawoo meŋ ka faaroo ke tilibuloo la.

⁷ Moo wuli kiliŋ si boyi ka faa i daala, waraŋ wuli taŋ, i karoo bee la, bari tana te i soto la.

⁸ I be i ñaa le yele la doroŋ ka juubeeroo ke, aduŋ i be a je la le Alla be moo jawoolu jarabi la ñaameŋ.

⁹ Bayiri i ye Yaawe, Mansa Tallaa le muta i la tankandirilaa ti, ka suturoo soto a bulu,

¹⁰ kasaara kuu te boyi la i kaŋ, aduŋ maasiiboo te kata la i la suwo la.

¹¹ A be a la malaayikoolu yaamari la i la kuwo la le, ka i kanta i taaraŋ siloolu bee kaŋ.

¹² Ì be i muta la niŋ ì buloolu le la santo, fo i siŋo kana taki bere la.

¹³ I si dori jatoolu niŋ biidaalu kaŋ, ka dori hani jata mendiŋolu niŋ saa kunamaalu kaŋ, aduŋ feŋ te i soto la.

¹⁴ Alla ko, “Bayiri i ye n kanu le, m be i kiisa la le. M be i tanka la le, bayiri i ye n loŋ ne, i jikita n na.

¹⁵ Niŋ i ye n kumandi, m be n danku la i ma le. Niŋ i bulata mantooroo kono, m be tara la i fee le. M be i bondi la le, ŋa horomoo dii i la.

¹⁶ M be neema la i ma siimaayaa le la. M be a yitandi la i la le m be i kiisandi la ñaameŋ.”