Jabuuroolu 89 - Mandinka Bible

Ka Alla daani a la kambeŋo kutayandoo la

Etani Esira koomalankoo la suukuwo.

¹ Yaawe*, m be tu la i la kanu bambaloo laa la suukuwo ti le fo fawu. M be i la tiliŋo kankulaa la le jamaanoolu bee la.

² M be a fo la le ko, i la kanu bambaloo loota le ka bambaŋ fo abadaa, aduŋ i la tiliŋo be bambandiŋ ne komeŋ saŋ fatoolu.

³ I ye ñiŋ ne fo ko, i ye kambeŋo le siti i niŋ i la tomboŋ moo teema, i ye i la dookuulaa Dawuda laahidi le ko,

⁴ i be kali mansa bondi la a koomalankoolu le kono fo abadaa, aduŋ i be a la mansasiiraŋo londi la jamaanoolu bee le la. S

⁵ Yaawe, Arijana bee ka i jayi i la kaawakuwolu kaŋ ne. I la malaayika kafoo le ka i la tiliŋo laa suukuwo ti.

⁶ Kiliŋ te saŋo santo meŋ ka munta ko ite. Kiliŋ te sembetiyolu kono meŋ niŋ i si kaañaŋ noo.

⁷ Ite Alla, i ñaasilaŋo be i la malaayika kafoo la baake le. I la waroo niŋ i ñaasilaŋo le tambita mennu bee be i dandaŋo la.

⁸ Hee Yaawe Alihawaa Maariyo*, jumaa le niŋ ite si kaañaŋ waroo la? Kooni Yaawe, i ka i la tiliŋo le yitandi kuwo bee to.

⁹ Fankaasoo niŋ a la sembe waroo, ite le marata a ma. Niŋ a jiibaliŋolu wulita, i ka ì tenkundi le.

¹⁰ I ye daafeŋo Rahabu toñonka le ka a kasaara. I ye i jawoolu janjandi le ka bo niŋ i semboo la.

¹¹ Saŋ fatoolu mu i taa le ti, aniŋ bankoo fanaa. Ite le ye duniyaa daa, aniŋ feŋolu mennu bee be a kono.

¹² Ite le ye feŋo bee daa ka bo duniyaa tonkoŋ ka taa tonkoŋ. Jayiroo ka bo i ye Tabori niŋ Herimoni* konkoolu to le, a bee niŋ seewoo.

¹³ I buloo semboo warata le, i buloo bambanta le, i bulubaa buloo be wulindiriŋ santo le.

¹⁴ I la mansayaa be looriŋ tiliŋo niŋ tooñaa le kaŋ. I ka tu tilindiŋ ne doroŋ, aduŋ kanu bambaloo le be i fee.

¹⁵ Seewoo be moolu le ye mennu ye i jayiñaa loŋ, mennu ka baluu ite Yaawe ñaatiliŋo maloo kono,

¹⁶ mennu ka seewoo i la kuwo la luŋ-wo-luŋ, aduŋ ì ka i la beteyaa kidimandi.

¹⁷ Ite la semboo la kallankeeyaa*, wo le ka m̀ bambandi, aduŋ i la konotodiyaa le ka semboo dii ǹ na.

¹⁸ Yaawe, ite le ye tankandirilaa tomboŋ ǹ ye, ite Banisirayila la Senuŋ Baa le ye mansa dii ǹ na.

¹⁹ Waati jaŋ koomanto, i diyaamuta i la lannamoolu ye jeroo kono ko: “Ŋa semboo dii kelejawaroo doo le la, ŋa a tomboŋ moolu kono, ŋa a sikandi.

²⁰ Ŋa n na dookuulaa Dawuda le ke mansa ti, ka a toloo niŋ n na tulu senuŋo* la.

²¹ Wo kamma la m buloo be tara la a koto le, aduŋ n na semboo be a bambandi la le.

²² A jawoolu te i kutu la a la, aduŋ moo kuruŋolu te a noo la.

²³ M be a jawoolu buruka la a ñaa koto le, aduŋ m be moolu juru la duuma le mennu ye a koŋ.

²⁴ N na tiliŋo niŋ kanu bambaloo be tara la a fee le, aduŋ a be nooroo ke la ka bo niŋ n tooyaa le la.

²⁵ M be a tinna le a buloo ye tara fankaasoo fannaalu kaŋ, a bulubaa buloo ye tara boloŋolu kaŋ.

²⁶ A be a fo la n ye le ko: ‘Ite le mu m Faamaa ti, n na Alla aniŋ n na semberaŋ beroo, meŋ ka n kiisa.’

²⁷ M be a ke la le ko n dinkee foloo, aduŋ ate le be sikandi la ka tambi duniyaa mansoolu bee la.

²⁸ M be n na kanu bambaloo muta la a fee le fo abadaa, aduŋ ŋa kambeŋo meŋ siti n niŋ a teema, a be tu la bambandiŋ ne.

²⁹ M be a la mansayaa buŋo bambandi la le fo fawu, aduŋ a la mansasiiraŋo be tu la keriŋ ne komeŋ saŋ fatoolu.

³⁰ Bari niŋ a koomalankoolu ye ì koo dii n na karandiroolu la, ì maŋ taama n na kaŋolu la,

³¹ niŋ ì ye n na luwaa soosoo, ì maŋ n na yaamaroolu muta,

³² wo to m be ì lipa la le ì la junuboolu kamma la, ŋa ì busa ì la kuu jawoolu kamma la.

³³ Bari n te m foño la ka n na kanu bambaloo yitandi Dawuda la, waraŋ ka n na laahidoo tiñaa a ye.

³⁴ N te n na kambeŋo soosoo la, waraŋ ka kumoo faliŋ meŋ bota n daa kono.

³⁵ Ŋa laahidoo taa kilinke m faŋo too senuŋo le la. N te Dawuda neenee la muk.

³⁶ A la mansayaa buŋo be tu la le fo fawu, aduŋ a la mansasiiraŋo be tara la keriŋ n ñaa koto le komeŋ tiloo.

³⁷ A be loo la le fo fawu, komeŋ karoo, meŋ mu n na seede koyoo ti saŋo santo.” S

³⁸ Bari saayiŋ Maariyo, i kamfaata i la tomboŋ mansa kamma le, i ye a bula ka i koo dii a la.

³⁹ I ye i la kambeŋo kuntu i niŋ i la dookuulaa teema le, aduŋ i ye a la mansanaafoo fayi buutoo kono ka a la dawuloo jindi.

⁴⁰ I ye a la saatewo sansaŋolu bee le teyi, i ye a la tatoolu ke tumbuŋo ti.

⁴¹ Moolu mennu bee ka tambi, ì ka a la feŋolu ñapinkaŋ ne. A dandanna moolu ye a ke jelefeŋo le ti.

⁴² I ye a tinna le a jawoolu buloo tarata a kaŋ ka a noo, i ye a konnantewolu bee seewondi.

⁴³ I ye a la hawusaroo* daa ŋooji le, i maŋ deemaari dii a la keloo kono.

⁴⁴ I ye a la mansayaa darajoo taa a bulu le, i ye a la mansasiiraŋo boyindi duuma.

⁴⁵ I ye a la fondinkeeyaa tiloolu kerekere baŋ ne, i ye maloo kupi a kaŋ. S

⁴⁶ Hee Yaawe, janniŋ muŋ tuma? Fo ite be tu la i faŋ maabo la le fo abadaa? Janniŋ muŋ tuma le i la kamfaa be tu la mala la ko dimbaa?

⁴⁷ I hakiloo ye bula nte la baluwo loo la sutiyaa la. Fo i ye hadamadiŋo daa kensenke le baŋ, ka faa doroŋ?

⁴⁸ Moo jumaa le si baluu a ye kaari saayaa ma? Jumaa le si a faŋ tanka noo kaburoo ma? S

⁴⁹ Maariyo, i la kanu bambaloo lee, i ye meŋ yitandi koomanto, i ye i la laahidi bambandiŋolu mennu dii Dawuda la?

⁵⁰ Hee Maariyo, kana ñina ì jututa nte la ñaameŋ, i la dookuulaa. Kana ñina ŋa moolu la nendiroolu dunoo taa ñaameŋ.

⁵¹ Yaawe, i jawoolu ye i la tomboŋ mansa neŋ ne, a taata daa-wo-daa ì ka a neŋ ne.

⁵² Tenturoo be Yaawe ye fo abadaa. Amiin! Amiin!