Jabuuroolu 88 - Mandinka Bible

Mantooroo kono duwaa

Kora koomalankoolu la Jabuura suukuwo. Meŋ be suukuulaa ñaatonkayaa la: A si laa juloo la ì ka a fo meŋ ye ko, “Mantoora waatoo kono.” Hemani Esira koomalankoo la suukuwo.

¹ Hee Yaawe* Alla, n na kiisandirilaa, n ka kumboo i ye le suutoo niŋ tiloo.

² N na duwaa moyi, i ye i tuloo loo n na kumboo la.

³ N na baluwo be faariŋ mantoora kuwolu le la, domandiŋ n si taa laakira.

⁴ N niŋ moolu le be konti kiliŋ, mennu taata kaburoo kono. N keta moo le ti fanka te meŋ na.

⁵ Moolu ye m bula le ko meŋ be furewolu kono, ko moo faariŋolu mennu be laariŋ kaburoo kono, i hakiloo maŋ tara mennu kaŋ fereŋ, ì maŋ tara i la maakoyiroo daa to.

⁶ I ye m bulandi saayaa diboo le kono duuma yereŋ, dulaa meŋ dibita, a diinonta.

⁷ I la kamfaa dunoo kuliyaata n kaŋ ne, aduŋ a ye n teerindi le komeŋ waame jiibaliŋolu. S

⁸ I ye a tinna le n teerimaalu ye i bo n to, i ye n ke ì ye moo ñewundiŋo ti. M be sukiriŋ ne, aduŋ kanañaa te n na.

⁹ Niikuyaa ye a tinna le n ñaalu dibita. Hee Yaawe, luŋ-wo-luŋ n ka i kumandi le. N ka m buloolu wulindi i ye le ka duwaa.

¹⁰ Fo ite ka kaawakuu le ke furewolu ye baŋ? Fo kaburukononkoolu ka wuli le ka i jayi baŋ? S

¹¹ Fo i la kanu bambaloo ka kankulaa kaburoo kono le baŋ, sako i la tiliŋo si fo wo kasaara dinkiraa kono?

¹² Fo ite la kaawakuwolu ka loŋ wo diboo kono le baŋ, sako i la tankandiroo wo dulaa to, daameŋ to mu ñinadulaa ti?

¹³ Yaawe nte de, n ka ite le la maakoyiroo kumboo. Soomandaa-wo-soomandaa n ka duwaa i ñaatiliŋo la le.

¹⁴ Hee Yaawe, muŋ ne ye a tinna i ye m bula? Muŋ ne ye a tinna i ye i ñaa kaasi n na?

¹⁵ Biriŋ n dindiŋ n toorata le, aduŋ n sutiyaata saayaa la le. I ye kijafara kuwolu le laa n kaŋ fo n keñaa bota n kono,

¹⁶ i la kamfaa kupita n kaŋ, i la kijabo jarabiroolu ye n kasaara,

¹⁷ ì waamemaa le ka m murubeŋ karoo bee la waati-wo-waati, ì ye n suki karoo bee le la.

¹⁸ I ye a tinna le n kanuntewolu niŋ n teeroolu ye i bo n to. Diboo doroŋ ne mu n kafuñoo ti.