Jabuuroolu 86 - Mandinka Bible

Maakoyiroo duwaaraŋo

Dawuda la duwaa.

¹ Hee Yaawe*, i lamoyi n na, i ye n danku, kaatu nte mu fentaŋo le ti, aniŋ moo koririŋo.

² N niyo tankandi kaatu nte foroyaata le. Ite le mu n na Alla ti. N tankandi, nte mu i la dookuulaa le ti, aduŋ ŋa n jikoo loo ite le kaŋ.

³ Maariyo, balafaa n ye. N ka tu woosii la i ye le tiloo bee.

⁴ N niyo seewondi, nte mu i la dookuulaa le ti. Hee Maariyo, ŋa n sondomoo loo ite le kaŋ.

⁵ Maariyo, ite beteyaata le, aduŋ i ka yamfa, i ka tu kanu bambaloo le yitandi la moolu la mennu ka i daani.

⁶ Yaawe, i lamoyi n na duwaa la, n kumboo kaŋo moyi, m be maakoyiri ñiniŋo le la.

⁷ Niŋ m be mantooroo kono n ka ite le kumandi, kaatu i ka n danku le.

⁸ Kooni Maariyo, ñoŋ te ite la, alla te jee meŋ be ko ite. I ye kuwolu mennu ke, kiliŋ te jee meŋ ye wolu ke.

⁹ Maariyo, ite le ye duniyaa moolu bee daa. Ì be naa le, ì ye sujudi i ye, aduŋ ì be i too horoma la le,

¹⁰ kaatu ite warata le, aduŋ i ka kaawakuwolu le ke. Ite doroŋ ne mu Alla ti.

¹¹ Yaawe, n karandi ka taama i la siloo la, fo n si soŋ i ma i la tooñaa kaŋ, i ye n sondomoo ke kiliŋ ti ka i too kuliyaa.

¹² M Maarii Alla, m be i tentu la niŋ n sondomoo bee le la, aduŋ m be i too horoma la le fo fawu.

¹³ Kaatu i ye i la kanu bambaloo yitandi nte la baake le. I ye n niyo tankandi le, n sutiyaata saayaa la ñaa-wo-ñaa.

¹⁴ Hee Alla, faŋ wara moolu le wulita nte kamma. Fitina moolu la kafoo le lafita ka n niyo taa, wolu mennu daa te ite la kuu to.

¹⁵ Bari Maariyo, ite mu Alla le ti meŋ balafaa warata, aduŋ i hiinanteeyaata, i buka kamfaa juuna, i la kanu bambaloo niŋ i la tiliŋo maŋ dandulaa soto.

¹⁶ I ñaa tiliŋ n na, i ye balafaa n ye. M bambandi, i ye n tankandi, nte mu i la dookuulaa musoo diŋo le ti, aduŋ m mu i la dookuulaa doroŋ ne ti.

¹⁷ Yaawe, i la konotodiyaa taamanseeroo yitandi n na, fo mennu ye n koŋ ì si malu, niŋ ì ye wo je, i la m maakoyoo niŋ n jusulandoo kamma la.