Jabuuroolu 84 - Mandinka Bible

Ka taa baturoo la Alla Batudulaa Buŋo to seewoo

Meŋ be suukuulaa ñaatonkayaa la: A si ke niŋ kontiŋ julu seyoo la. Kora koomalankoolu la Jabuuroo.

¹ Yaawe* Alihawaa Maariyo*, i sabatidulaa buŋo, a kekuuta baake le.

² Nte be meeyaariŋ ne, ka tara jee, ka tara Yaawe la luwolu to. Seewoo dunta n sondomoo niŋ m balajaatoo bee le la ka suukuwo laa Alla baluuriŋo ye.

³ Kooni Yaawe Alihawaa Maariyo, Alla, n na Mansa, hani jaataliŋo ye jee ke a yaa ti le, aduŋ naanaa ye ñaŋo ke a faŋ ye jee le, ka a diŋolu balundi i la sadaabodulaalu* daala.

⁴ Barakoo be i la buŋo kono sabatilaalu ye, mennu ka tu suukuulaa la, ka i jayi. S

⁵ Barakoo be moolu le ye mennu ka bambaŋo soto i bulu, mennu ka tara hameriŋ ka taa baturoo la Siyoni* Konkoo to.

⁶ Niŋ ì be tambi la Baka, wo wulumbaŋ jaaroo kono, a ka ke ì ye woyoolu le ti, aduŋ samaajii foloo ka a bee neemandi le.

⁷ Ì ka taa ñaameŋ, ì ka bambaŋ wo le ñaama, fo kiliŋ-wo-kiliŋ ye loo Alla ñaatiliŋo la Siyoni.

⁸ Hee m Maarii Alihawaa Maariyo, n na duwaa moyi. Yaakuba la Alla, n na duwaa muta. S

⁹ Hee Alla, ǹ na mansa juubee, i ye kaayaa a ye, i ye mansa meŋ tomboŋ.

¹⁰ Ka tili kiliŋ ke i batudulaa luwolu to, wo le fisiyaata ka tili wuli kiliŋ ke dulaa koteŋ. Ŋa ke n na Alla la bundaa kantalaa ti, wo le fisiyaata ka tara sabatiriŋ moo kuruŋolu la suwolu kono.

¹¹ Yaawe Alla ka munta n ye le ko tiloo, aniŋ tankaraŋ koteeroo*, ate le ka hiina aniŋ ka horomoo dii. Moolu mennu baluuñaa maŋ sootaari soto, a buka wolu bali kuu kende la.

¹² Yaawe Alihawaa Maariyo, barakoo be moo le ye, meŋ dankeneyaata i la.