Jabuuroolu 83 - Mandinka Bible

Banisirayila jawoolu jaraboo duwaa

Asafu la Jabuura suukuwo le mu.

¹ Hee Alla, kana tu deyiriŋ. Hee Alla, kana tu tenkundiŋ ka i deyi.

² Kaatu a fele, i jawoolu be maamaŋ kaŋ ne, wolu mennu ye i koŋ, ì kumbenta le,

³ ì ye feeroolu siti i la moolu kamma, ka jamfaa taamandi i la sutura moolu kamma.

⁴ Ì ko, “Ali naa ŋà ì la bankoo tumbuŋ, fo moo hakili kana bula Banisirayila la kotenke.”

⁵ Ì ye jamfaa siti kaŋ kiliŋ ne la, ì kambenta i kamma.

⁶ Edomunkoolu niŋ Isimayila koomalankoolu le mu, Mowabinkoolu niŋ Hajara koomalankoolu,

⁷ ka taa Kebalinkoolu, Ammoninkoolu, aniŋ Amalekinkoolu, Filisitinkoolu, aniŋ Tirenkoolu.

⁸ Asiriyankoolu fanaa kafuta ì ma le, ka wo Luuti koomalankoolu bambandi. S

⁹ I ye meŋ ke Midiyaninkoolu la, i ye meŋ ke Sisera niŋ Yabini la Kisoni Wulumbaŋo to, wo ñoŋo ke ì la.

¹⁰ Wolu mennu kasaarata Endori, ì furewolu tolita bankoo to.

¹¹ Ì la ñaatonkoolu ke ko Orebu niŋ Seebu, i ye ì la maralilaalu ke ko Seba niŋ Salimunna.

¹² Wolu mennu kumata ko, “Ali ŋà Alla la bankoo taa ka a ke ǹ taa ti.”

¹³ M Maarii Alla, ì tindi ko saafoñoto kankaŋo, ì ye ke ko fuufulewo, foñoo kono.

¹⁴ Ko dimbaa ka wuloo jani ñaameŋ, aniŋ taakaa ka mala konkoolu kaŋ ñaameŋ,

¹⁵ ì bayindi i la turubaadoo la wo ñaama, i ye ì kijabo niŋ i la foñoto saŋaroo la.

¹⁶ Hee Yaawe*, malu kuwo feenee ì kaŋ, fo ì si i too la waroo loŋ.

¹⁷ Ì malundi ka ì jikilateyindi fo abadaa. Ì kasaara maloo kono,

¹⁸ fo ì si a loŋ ko, ite doroŋ ne mu Yaawe ti, aniŋ ko, ite le mu Mansa Tallaa ti, duniyaa bee kunna.