Jabuuroolu 81 - Mandinka Bible

Alla la beteyaa aniŋ Banisirayila la jenkoo

Meŋ be suukuulaa ñaatonkayaa la: A si ke niŋ kontiŋ julu seyoo la. Asafu la Jabuuroo le mu.

¹ Ali suukuwo laa Alla ye santo, ǹ na semboo ka bo ate le bulu. Ali wuuri seewoo kono ka Yaakuba la Alla jayi.

² Ali wutu suukuwo ti, ka tambuuroo kosi, aniŋ kontiŋo niŋ kooraa julu diimaa.

³ Ali binoo fee Kari Kutoo* la, aniŋ kari maloo tumoo la, ǹ na juuraloo luŋo la.

⁴ Kaatu a mu luwaa le ti Banisirayilankoolu ye, kaŋo meŋ, Yaakuba la Alla ye a dii.

⁵ Alla ye Yusufa koomalankoolu yaamari wo le la, kabiriŋ a ye Misira bankoo moolu kele. Wo waatoo la, ŋà diyaamukaŋo moyi le, bari foloo m̀ maŋ a loŋ.

⁶ A naata a fo ko, “Ŋa ali sañoolu dahandi dunoo la, ŋa ali buloolu foñondi sinsiŋ kuliŋ sikoo la.

⁷ Ali ye n kumandi ali la mantooroo kono, ŋa ali bondi bataa kono, ŋa n danku ali ma saŋ feteŋo niŋ diboo le kono. Ŋa ali kotobo Meriba Woyoo to le. S

⁸ “N na moolu, ali i lamoyi ŋa ali dandalaa. Kooni Banisirayilankoolu, muna ali i lamoyi n na.

⁹ Batufeŋ koteŋ maŋ ñaŋ na tara la ali fee. Ali kana sujudi ka bantalanka batufeŋolu batu fereŋ.

¹⁰ Nte le mu Yaawe* ti, ali la Alla, meŋ ye ali bondi Misira bankoo kaŋ. Ali ali daa yele ka n daani, aduŋ m be a fandi la le.

¹¹ “Bari Banisirayila maŋ i lamoyi n na, n na moolu maŋ soŋ m ma.

¹² Bituŋ ŋa ì tu ì la sondome jaa kaŋ, ka bula ì fansuŋ yaamaroolu nooma.

¹³ “Kooni, niŋ Banisirayila taamata n na siloolu la, niŋ n na moolu ye i lamoyi n na,

¹⁴ tennuŋ m be tariyaa la ì jawoolu ñankoŋ na le, m buloo ye laa ì toorandilaalu kaŋ.

¹⁵ Mennu ye nte Yaawe koŋ, ì ŋunumatoo le be n waliŋ na, aduŋ ì la jaraboo be tu la le fo fawu.

¹⁶ N si alitolu daañini siimaŋ kendoo la, aniŋ liyo meŋ ka bo berehuwo kono.”