Jabuuroolu 76 - Mandinka Bible

Alla le mu duniyaa bee la kiitindirilaa ti

Meŋ be suukuulaa ñaatonkayaa la: A si laa niŋ kontiŋolu la. Asafu la Jabuura suukuwo le mu.

¹ Yahuuda moolu ye Alla loŋ ne, a too warata Banisirayila kono le famfaŋ.

² A ye Yerusalaamu le ke a taradulaa ti, Siyoni* Konkoo le mu a sabatidulaa ti.

³ A ye a jawoolu la kalabeñe saŋaroolu buruka jee le, ka taa ì la tankaraŋ koteeroolu*, hawusaroolu*, aniŋ ì la kelejooraŋ koteŋolu bee. S

⁴ Hee Alla, ite kallankeeyaata* le, i warata ka tambi konko baalu la, mennu be tu la looriŋ fo abadaa.

⁵ Ì ye i jawu kelediŋ fatiŋolu bulu kenseŋo londi le. Saayiŋ ì be laariŋ siinoo kunimbaloo le kono. Wo kelejawaroolu kiliŋ te a buloo wulindi noo la.

⁶ Kooni, biriŋ ite Yaakuba la Alla kumata ì ma, wo suuborindilaalu niŋ ì la suwoolu ye i laa le, ì sumaayaata dok.

⁷ Ite doroŋ ne mu silantaa ti. Jumaa le si i loo noo i fee, niŋ i jusoo kandita?

⁸ I ye i la kiitindiroo taamandi le ka bo naŋ Arijana kono, duniyaa moolu bee le silata fo deyoo keta yem,

⁹ tuma meŋ na ite Alla wulita ka kiitiyo kuntu, ka duniyaa moo toorariŋolu bee tanka. S

¹⁰ Hadamadiŋolu la kamfaa i kamma, wo labaŋo be ke la i ye tenturoo le ti. Ì la kamfaa be ke la i ye ñaroo le ti.

¹¹ Ali laahidoolu taa Yaawe* ali la Alla ye, ali ye ì timmandi. Alitolu bantala bankoolu* bee, ali soorifeŋolu samba a ye naŋ, ate meŋ ñaasilaŋo warata.

¹² Ate le ka maralilaalu la faŋ waroo daŋ, a ka duniyaa mansoolu kijabo.