Jabuuroolu 73 - Mandinka Bible

Talaadaa 3 Jabuuroolu 73—89 Dankeneyaa bambandiŋo

Asafu la Jabuuroo.

¹ Tooñaa, Alla beteyaata Banisirayilankoolu fee le, moolu fee mennu sondomoo seneyaata.

² Nte de, domandiŋ n si taki, m be naa tarabasi la,

³ kaatu n kiiliyaata faŋ wara moolu la kuwo le la, biriŋ ŋa a je kuwo bee be sooneeyaariŋ moo kuruŋolu ye.

⁴ Kaatu ì buka kuu dimindiŋ soto, ì jaatoo bambanta, a kereyaata.

⁵ Ì buka mantoora ko moo doolu ka ke ñaameŋ. Bataa buka ì taki ko moo doolu.

⁶ Wo kamma la ì ye faŋ waroo ke kantotaa ti, fitinoo dendikamaa be dundiŋ ì la,

⁷ ì ñaakesoolu la waroo be faariŋ kuu jawoo le la, ì sondomoolu be kutindiŋ kuu kuruŋo la.

⁸ Ì ka jele moo koteŋolu la ì ka kuma jawoo fo, aduŋ ì la faŋ waroo kaŋ ì ka moolu silandi.

⁹ Ì ka ì daa tiliŋ santo le ka Alla sooki, aduŋ ì ka ŋaañaa ì neŋo la taariŋ, duniyaa moolu kono.

¹⁰ Wo ye a tinna le Alla la moolu faŋo yelemata ka ì jayi, aduŋ ka laa wo moolu la kumoo la keta ì fee le ko jii miŋo.

¹¹ Ì ye ñiŋ ne muta ko Alla te a loŋ na, ko Mansa Tallaa te wo loŋ noo la.

¹² Moo kuruŋolu be teŋ ne, ì ka tara dahaa le kono, aduŋ ì la sotoo ka lafaa le doroŋ.

¹³ Nte ŋa n sondomoo loo kuu senuŋo kaŋ ne kensenke, aduŋ m maŋ baara junuboo la.

¹⁴ Luŋ-wo-luŋ koleyaa le ka n taki, aduŋ n ka jarabi le fanikee-wo-fanikee.

¹⁵ Niŋ n ko m be bula la wo moolu la miirañaa nooma, n si badali ka bo i la moolu kono.

¹⁶ Ŋa m miira le ka ñiŋ kuwo fahaamu, bari a keta m fee kuu koleŋ baa le ti,

¹⁷ fo kabiriŋ n taata i Batudulaa Senuŋo kono, bituŋ n naata a fahaamu moo kuruŋolu labaŋo be ke la ñaameŋ.

¹⁸ I be ì ke la dulaa namariŋo le to, ì la boyoo si tariyaa daameŋ, ka ì boyindi kasaaroo kono.

¹⁹ Ì be kasaara la le waati kiliŋ, kooroo ye ì domo,

²⁰ ì ye ke komeŋ niŋ moo siiboota, a la siiboo ka yeemaŋ ñaameŋ. Wo ñaa kiliŋo ñaama, ite Maariyo, i be jutu la ì la le komeŋ niiniyo.

²¹ Kabiriŋ n niyo kuyaata, a dunta n na fo n jusoo to,

²² n keta hakilintaŋo niŋ feŋ lombaloo le ti, n keta i ñaa koto ko beeyaŋo.

²³ Bari hani wo m be sabatiriŋ i fee le, aduŋ i ye m muta niŋ m bulubaa buloo le la.

²⁴ I ka n kanda niŋ i la yaamaroo le la, wo koolaa i si naa n taa, i ye n dundi i la horomoo kono.

²⁵ Ŋa jumaa le soto Arijana kono ite koolaa? Aduŋ feŋ te duniyaa kono n ñaanita meŋ na ite koolaa.

²⁶ N jaatoo niŋ n sondomoo si kori noo, bari n sondomoo la bambaŋo be dendiŋ Alla le la. Ŋa ate doroŋ ne soto fo abadaa.

²⁷ A koyita m ma le ko, moolu mennu be jamfariŋ i la, wolu be kasaara la le. I be moolu buruka la le mennu badalita i ma.

²⁸ Bari nte fee de, ka tara sutiyaariŋ Alla la, wo mu n ye kuu kende le ti. Ŋa Maarii Yaawe* le ke n jikiraŋo ti, ñiŋ kamma la n si kuwolu fo moolu ye a ye mennu bee ke.