Jabuuroolu 72 - Mandinka Bible

Neema duwaa mansa ye

Sulemani la Jabuuroo.

¹ Hee Alla, i la kiitiiteyoo yitandi mansa la, i ye i faŋo la tiliŋo duŋ mansariŋo to.

² Allamaa a ye kiitiyo taamandi tiliŋo la i la moolu teema, aniŋ ka tooñaa taamandi fentaŋolu ye, i la moolu kono.

³ Allamaa bankoo moolu ye kayiroo niŋ tiliŋo soto, a la marali tilindiŋo kono.

⁴ Allamaa mansa ye fuwaaroolu boloo londi moolu kono, a ye fentaŋolu deemaa, aniŋ ka moo mantooralaalu buruka.

⁵ Allamaa mansa niŋ a koomalankoolu ye baluu jamaanoolu bee la, komeŋ tiloo niŋ karoo.

⁶ Allamaa mansa ke la komeŋ samaajiyo, meŋ ka ke fiifeŋolu kaŋ, komeŋ sanjiyo ka buruntu bankoo kaŋ ñaameŋ.

⁷ Allamaa tiliŋo ye wajabi a tiloo la, kayiroo ye siyaa, fo janniŋ karoo la boo be daŋ na.

⁸ Allamaa a la maraloo ye bo fankaasi ka taa fankaasi, aniŋ ka bo Yufurati Boloŋo to ka taa fo duniyaa daŋo to.

⁹ Keñewuloo* kono siilaalu bee si ñoyi a ye, aduŋ a jawoolu bee si i boyi a ye duuma.

¹⁰ Tarisi mansoolu, aniŋ baajooyoolu la mansoolu si naamoo joo a yaa. Seba niŋ Seeba bankoolu la mansoolu si soorifeŋolu dii a la.

¹¹ Mansoolu bee si ñoyi a koto, aduŋ duniyaa bankoolu bee si dookuwo ke a ye.

¹² Mansa ka fentaŋolu deemaa le niŋ ì ye a kumandi, ka taa fuwaaroolu aniŋ maakoyilaa te mennu la.

¹³ A bala ka faa moo koririŋolu niŋ fentaŋolu ye le, aduŋ a ka sotobaloolu niyo tankandi le.

¹⁴ A ka ì bondi mantooroo niŋ fitinoo kono le, kaatu ka ì yeloo boŋ, wo mu a ñaa tanoo le ti.

¹⁵ Allamaa mansa mee la, Allamaa sanoo ye bo a ye naŋ Seba. Allamaa duwaa ye tu ke la a ye. Allamaa moolu ye tu a tentu la.

¹⁶ Allamaa siimaŋ kesoo ye fuuma bankoo kaŋ, ka taa fo konkoolu turoolu kaŋ. Ì ye diŋ komeŋ Libanooni yiroolu. Allamaa moolu mennu be saatewo kono ye yiriwaa ko ñaamoo ka siyaa kenoolu kono ñaameŋ.

¹⁷ Allamaa mansa too tu la keriŋ fo fawu, a too ye tu bo la ko tiloo. Allamaa bankoolu moolu ye neema ka bo niŋ ate la, aniŋ ì ye a kumandi neemariŋo la.

¹⁸ Tentoo be Yaawe* ye, Banisirayila la Alla, ate doroŋ ne ka kaawakuwolu ke.

¹⁹ Ali a jayi a too ñiimaa la fo abadaa. Allamaa a la kallankeeyaa* ye faa duniyaa bee kono. Amiin! Amiin!

²⁰ Yese dinkewo Dawuda la duwaaraŋo kumfaata jaŋ ne.