Jabuuroolu 7 - Mandinka Bible

Tanka ñini duwaaraŋo

Dawuda la duwaa suukuumaa, a ye meŋ laa Yaawe* ye, Kusi la kuwo to, Benjamini lasiloo moo.

¹ Hee Yaawe, n na Alla, n ka tankoo ñini ite le bulu. M bondi n toorandilaalu bulu, i ye n kiisa ì ma.

² Niŋ wo nte, ì jatamaalu si m faraŋ-faraŋ taariŋ, ì ye n janjaŋ, moo te n tankandi noo la.

³ Hee Yaawe, n na Alla, niŋ a ye a tara ŋa kuu le ke, niŋ a ye a tara ŋa kuu tilimbaloo le taamandi,

⁴ niŋ a ye a tara ŋa n teerimaa joo kuu jawoo le la, waraŋ ka n jawoo tiñaa, daliila te a la,

⁵ wo to Allamaa n jawoolu ye m bayindi, ì ye m muta. Allamaa ì ye n doriŋ-doriŋ bankoo to fo n siyo ye baŋ, ì ye m furewo landi buutoo kono. S

⁶ Hee Yaawe, wuli i la kamfaa kaŋ, i ye loo n jawoolu kamma, ì niŋ ì la jusukandoo. N na Alla, maamaŋ. Ite ye kiitiiteyi koyiriŋo le kaniŋ.

⁷ Banku moolu bee kafu ñoo ma i ñaatiliŋo la, i ye tara marariŋ ì ma, ka bo Arijana kono.

⁸ Yaawe, ite le ka kiitiyo teyi moo bee ye. Sembetii Baa, kiitiyo teyi n ye ka n na boloo yitandi, aniŋ n na sootaaribaliyaa.

⁹ Moo kuruŋolu la kuruŋyaa daŋ, i ye moo tilindiŋolu londi ka bambaŋ. Ite Alla tilinta le, i ka moo-wo-moo la miiroo niŋ a la hame kuwolu koroosi le.

¹⁰ Alla le mu n ye tankaraŋ koteeroo* ti, a ka moolu kiisa le tiliŋo be mennu sondomoo to.

¹¹ Alla le mu kiitiiteyilaa tilindiŋo ti, a ka tu a la kamfaa yitandi la le, kuu jawoo kamma la.

¹² Niŋ moo kuruŋolu maŋ tuubiseyi, Alla be a la hawusaroo* diyaa la ì kamma le. A be a la kalandiŋo ŋaaji la le ka a parendi.

¹³ A ye a la moofaa jooraŋolu parendi le, ka paree bundiroo ke la a la kalabeñe dimbaamaalu la.

¹⁴ A juubee, moo kuruŋo ka kuu jawoo le fudi. A ka tara konomaariŋ feere kuruŋo doroŋ ne la, a ye naa jamfaa kuwo wuluu.

¹⁵ A ka jamfaa dinkoo le siŋ moo koteŋolu kamma, bituŋ a faŋo ye naa boyi wo dinkoo kono.

¹⁶ A la feere kuruŋolu ka naa donko a faŋo kuŋo le kaŋ. A ka fitinoo meŋ kurukuru, a be denkuŋ na a faŋo le kaŋ.

¹⁷ M be Yaawe tentu la a la tiliŋo kaŋ ne. M be suukuwo laa la le ka Yaawe jayi a too la, Mansa Tallaa.