Jabuuroolu 67 - Mandinka Bible

Duniyaa moolu bee si Alla ñaasilaŋo soto

Meŋ be suukuulaa ñaatonkayaa la: Kontiŋolu si kosi. Jabuura suukuwo le mu.

¹ Alla, hiina ǹ ye, i ye neema m̀ ma, i ye i ñaa diyaa m̀ fee, S

² fo duniyaa moolu bee si i la lafoo loŋ, aduŋ bankoolu bee si i la kiisandiri semboo loŋ.

³ Maarii Alla, duniyaa moolu bee si i tentu, moolu bee si i jayi.

⁴ Duniyaa moolu bee si seewoo ka suukuwo laa, kaatu i ka kiitiyo kuntu moolu teema tiliŋo le la, aduŋ i ka siloo yitandi duniyaa bankoolu bee le la. S

⁵ Maarii Alla, duniyaa moolu bee si i tentu, moolu bee si i jayi.

⁶ Bankoo ye fiifeŋ betoolu wuluu kendeke le, ǹ ka Alla meŋ batu, a neemata m̀ ma le.

⁷ Alla neemata m̀ ma le, wo to moolu be duniyaa fannaa daa-wo-daa, ì si Alla ñaasilaŋo soto.