Jabuuroolu 63 - Mandinka Bible

N niyo suulata Alla le la

Dawuda la Jabuuroo, kabiriŋ a be Yahuuda keñewuloo* kono.

¹ Hee Alla, ite le mu n na Alla ti, i la kuwo ye n loo le, i la kuwo ye m muta le ko mindoo, m balajaatoo bee le ye i la kuwo kaniŋ. A ka munta le ko ñiŋ banku jaaroo, jii te daameŋ to, fo bataa.

² Ŋa i je i Batudulaa kono le. N ñaa loota i la waroo kaŋ ne, aniŋ i la kallankeeyaa.*

³ I la kanu bambaloo le fisiyaata baluwo ti. Nte be i jayi la le.

⁴ M be i tentu la le, niŋ m be baluwo to. M be m buloolu wulindi la i ye le ka duwaa.

⁵ N niyo si daañini kendoo ke, aduŋ m be suukuu diimaalu laa la le ka i jayi.

⁶ Niŋ ŋa n laa n na laaraŋo kaŋ, n hakiloo ka tara i kaŋ ne, n ka m miira i la le suutoo bee.

⁷ Bayiri ite le keta m maakoyilaa ti, n ka tara i dampaŋo le koto, wo to m be suukuwo laa la le seewoo kamma la.

⁸ Ŋa n deŋ ite le la, aduŋ i buloo be n koto le ka n tanka.

⁹ Bari moolu mennu lafita m faa la, wolu le be kasaara la, ì ye taa kaburoo kono.

¹⁰ Ì be ì faa la hawusaroo* le la, ì ye ke kunkuwuloolu la maafoo ti.

¹¹ Bari mansa be seewoo la Alla la kuwo la le. Moolu mennu ye laahidoo taa Alla too la, ì be a tentu la le. Bari Alla be faniyaa folaalu deyindi la le.