Jabuuroolu 62 - Mandinka Bible

Dahaa be Alla doroŋ ne fee

Meŋ be suukuulaa ñaatonkayaa la: Yedutuni tooyaa la. Dawuda la Jabuuroo le mu.

¹ N niyo la dahaa be Alla doroŋ ne fee, n na tankoo be bo la ate le bulu.

² N na semberaŋ beroo mu ate doroŋ ne ti, aniŋ n na tankoo. A mu n ye tatoo le ti, hani n te maamaŋ na muk.

³ Janniŋ muŋ tuma le mu ali be tu la boyi la moo kaŋ, ali bee ye a boyindi ko tata sansaŋ laamaariŋo, sansaŋo meŋ be cojiriŋ?

⁴ Ì be pareeriŋ ne doroŋ ka a bondi a la dulaa buuñaariŋ baa to. Faniyaa le ka ì kontaani. Ì ka kuu kendoo duwaa ì daa le la, bari ì ka dankaroo ke ì sondomoo kono. S

⁵ N niyo si dahaa soto Alla doroŋ ne fee, kaatu n jikoo be ate le kaŋ.

⁶ N na semberaŋ beroo mu ate doroŋ ne ti, aniŋ n na tankoo. A mu n ye tatoo le ti, hani n te maamaŋ na.

⁷ N na tankoo niŋ n na horomoo be looriŋ Alla le kaŋ. N na semberaŋ bere bambandiŋo le mu, aniŋ n tuukuraŋo.

⁸ Moolu, ali dankeneyaa Alla la waati-wo-waati. Ali ali kono kuwo bee fo a ye, kaatu ate le mu ǹ tuukuraŋo ti. S

⁹ Hadamadiŋo mu niijii foñoo doroŋ ne ti, biriŋ moo baa fo moo koteŋ kenseŋ, a bee nafantaŋ. Niŋ i ye ì laa peesaraŋo kaŋ, ì te feŋ boyi la. Hani niijii foñoo le kuliyaata ì ti.

¹⁰ Ali kana jiki nakaroo la, waraŋ ka faŋ waroo ke suuñaari feŋo kaŋ. Ali la naafuloolu si lafaa ñaa-wo-ñaa, ali kana jiki ì la.

¹¹ Alla diyaamuta seneyaarinke le. Ŋa ñiŋ ne moyi n tulu fuloo la ko, semboo mu ite Alla le taa ti,

¹² aduŋ Maariyo, kanu bambaloo be ite le fee. Tooñaa, i be moo-wo-moo joo la a la baaroo la le.