Jabuuroolu 60 - Mandinka Bible

Alla la kiisandiroo duwaa

Meŋ be suukuulaa ñaatonkayaa la: A si laa juloo la ì ka a fo meŋ ye ko, “Seedeyaaraŋo Firoo.” Karandirilaŋo le mu. Dawuda la Jabuuroo le mu. Tuma meŋ na a niŋ Aramunkoolu keleta mennu bota Naharayimu, aniŋ Soba. Yowabu naata muru, a ye Edomunkoolu moo wuli taŋ niŋ fula faa Koo Wulumbaŋo kono.

¹ Hee Alla, i ye i bo ǹ to le, i ye ǹ na tankoo tiñaa. I tarata kamfaariŋ ǹ kamma le, bari saayiŋ m̀ murundi ǹ ñaama.

² I ye ñiŋ bankoo jarajarandi le, i ye a fara. A faroolu dadaa, kaatu a be kasaara kaŋ ne.

³ I ye i la moolu jarabi jawuke le. A ka munta i ye m̀ mindi doloo le la, ka ǹ siirisaarandi.

⁴ I ye bandeeroo le wulindi moolu ye, mennu ye i kuliyaa, ñiŋ kamma ì si tanka jawoolu la kalabeñoo ma. S

⁵ Ǹ na duwaa jaabi, ǹ kiisa i ye ǹ deemaa ka bo niŋ i bulubaa buloo la, ñiŋ kamma la i la kanu moolu si tanka.

⁶ Alla ye ñiŋ ne laahidi a la seneyaa kaŋ ko: “N na nooroo kaŋ, ka bo tiliboo la, m be Sekemu tundoo talaŋ-talaŋ na le, ka taa tilijiyo la, ŋa Sukoti Wulumbaŋo niilaa.

⁷ Kileyadi tundoo mu n taa le ti, Manase fanaa mu n taa le ti. N na kelejawaroolu be bo la Efurayimu* le kono, n na mansoolu ye bo Yahuuda kono.

⁸ Mowabi, wo mu n na bulu kuuraŋ miraŋo le ti. N ka n na samatoo wura Edomu bankoo le kaŋ ka n tooyaa yitandi a kunna. N ka wuuroo kumandi Filisitinkoolu ma le, n na ì noo kaŋ.”

⁹ Jumaa le be n samba la saatee tatariŋo to? Jumaa le be tambi la n ñaato Edomu kamma?

¹⁰ Hee Alla, i ye i bo ǹ to le duŋ baŋ? Fo i te tara la ǹ na kelediŋolu fee keloo to kotenke?

¹¹ Dukaree, m̀ maakoyi ǹ jawoolu to, kaatu hadamadiŋo la maakoyiroo mu kenseŋ ne ti.

¹² Niŋ ite Alla be m̀ fee, m̀ be nooroo ke la le. Ite le be ǹ jawoolu dori la duuma.