Jabuuroolu 54 - Mandinka Bible

Duwaa, ka tanka jawoolu ma

Meŋ be suukuulaa ñaatonkayaa la: A si laa niŋ kontiŋolu la. Dawuda la suukuwo, waatoo meŋ na Sifunkoolu taata Sawulu yaa, ì ko a ye ko, “Dawuda be maaboriŋ ǹ yaa le.”

¹ Hee Alla, n tanka ka bo niŋ i too la, i ye n na boloo dii n na ka bo niŋ i la semboo la.

² Hee Alla, i lamoyi n na duwaa la, i ye i tuloo loo n na kumoolu la.

³ Luntaŋolu le wulita n kamma. Fitina moolu le be a kata kaŋ ka m faa, mennu daa te Alla la kuu to. S

⁴ Tooñaa-tooñaa, Alla le mu m maakoyilaa ti, Maariyo le mu n niyo kantalaa ti.

⁵ A be n jawoolu joo la ì la kuu kuruŋolu la le. Maariyo, i la tiliŋo kaŋ, ì kasaara.

⁶ M be fankadaŋ sadaa* bo la i ye le. Hee Yaawe*, m be i tentu la le ka bo niŋ i too la, kaatu i beteyaata baake le.

⁷ I ye m bondi n na mantooroolu bee kono le, aduŋ n ñaa ye n jawoolu la boyoo je le.