Jabuuroolu 52 - Mandinka Bible

Neeneerilaalu la jaraboo

Meŋ be suukuulaa ñaatonkayaa la: Dawuda la suukuwo, waatoo meŋ na Doyeki Edomunkoo taata Sawulu yaa ka a fo a ye ko, Dawuda taata Ahimeleki yaa le.

¹ Ite jarintewo, muŋ ne ye a tinna i ka i faŋ wara kuu jawoolu kaŋ, a ye a tara Alla la kanu bambaloo be nte le fee luŋ-wo-luŋ?

² Ite neeneerilaa, i ka tara kasaara kuwo le siti kaŋ. I neŋo be saŋarariŋ ne ko muru diimaa.

³ I ye kuu jawu kewo le kanu, ka tambi kuu kende kewo la, aniŋ faniyaa foo, ka tambi tooñaa foo la. S

⁴ Ite neeneerilaa, i ye kumoolu le kanu mennu ka tiñaaroo ke.

⁵ Bari Alla be i kasaara la le fereŋ, a ye i wafati ka i bondi i la suwo kono. A be i suloo wutu la le ka bo duniyaa baluwo to. S

⁶ Moo tilindiŋolu si ñiŋ je, ì ye masilaŋ, aduŋ i la kuwo si ì jele, ì ye a fo ko,

⁷ “A juubee, kewo fele meŋ maŋ soŋ ka tankoo ñini Alla bulu, bari a jikita a la naafuloo la siyaa le la, ka fankoo ñini kuruŋyaa kono.”

⁸ Bari nte ka munta le ko olifu* yiroo meŋ falinta Alla Batudulaa Buŋo* to. Ŋa n jikoo loo Alla la kanu bambaloo le kaŋ fo abadaa.

⁹ M be ite Alla le tentu la fo abadaa, i la keroolu kaŋ. I too be tu la n daa le i la lannamoolu ñaatiliŋo la, kaatu i beteyaata baake le.