Jabuuroolu 49 - Mandinka Bible

Moo la fankoo te a tanka noo la saayaa ma

Meŋ be suukuulaa ñaatonkayaa la: Kora koomalankoolu la Jabuuroo le mu.

¹ Moolu bee, ali i lamoyi ñiŋ na. Duniyaa moolu bee, ali ali tuloo loo ñiŋ na.

² Moo baa, moondiŋ, fankamaalu niŋ fuwaaroolu bee, ali i lamoyi.

³ N na kumoolu be ñaameŋo le dii la, aduŋ n na miiroolu niŋ fahaamuroo le mu.

⁴ M be n hakiloo loo la kuma kotoomaalu le kaŋ, aduŋ m be ì kotoo firiŋ na le niŋ m be kontiŋo kosi la.

⁵ Nte te sila la koleyaa waatoo kono, niŋ neeneerilaa kuruŋolu ye m murubeŋ.

⁶ Ì be jikiriŋ ì la naafuloolu le la, ì ka kibiri ì la soto baa la.

⁷ Moo te moo doo kumakaa noo la, a te Alla joo noo la a niyo soŋo la,

⁸ kaatu moo niyo joo warabaata le. Joo te soto la meŋ si a sii,

⁹ ka a tinna moo ye baluu fo abadaa, a ye tanka kaburoo ma.

¹⁰ A be koyiriŋ ne ko, hani moo ñaamendiŋolu ka faa le, aduŋ toolewolu niŋ moo hakilintaŋolu ka kasaara le. Ì bee ka ì la naafuloo tu moo doolu le ye.

¹¹ Ì la kaburoolu le ka ke ì la suwolu ti fo abadaa, ì ka tara wo le to fo fawu, ì nene ka ali fansuŋ kenoolu soto ñaa-wo-ñaa.

¹² Moo la fankoo te a tanka noo la saayaa ma, a be faa la le komeŋ daafeŋolu.

¹³ Wo le be ke la moolu la mennu jikita ì faŋ na, aniŋ ì noomalaalu, mennu ka tara jikiriŋ itolu fokumoolu la. S

¹⁴ Ì tombonta le ka faa komeŋ saajiyolu, saayaa be ì kenkeŋ na le komeŋ kantarilaa. Moo tilindiŋolu be dori la ì kaŋ ne soomandaa, ì baloolu ye tara toli kaŋ kaburoo kono, daameŋ jamfata ì la koridaa ñiimaalu la.

¹⁵ Bari Alla be nte kiisa la le ka bo saayaa kono, a ye naa n taa. S

¹⁶ Kana jaakali niŋ moo keta naafulutiyo ti, niŋ a la sotoo lafaakuuta.

¹⁷ Niŋ a faata a te feŋ samba la ñoo la. A niŋ a la naafuloo te taa ñoo la kaburoo kono.

¹⁸ Hani niŋ moo ye barakoo soto a ñaama, a la baluwo waatoo la, aduŋ moolu ye a jayi kaatu a ye kututeyi a faŋ ye le,

¹⁹ a be faa la le ka kafu a mumuñolu ma, a te tiloo la maloo je la kotenke.

²⁰ Moo meŋ fankamaayaata bari a maŋ fahaamuroo soto be faa la le komeŋ daafeŋolu.