Jabuuroolu 45 - Mandinka Bible

Mansa maañoobiti Jabuuroo

Meŋ be suukuulaa ñaatonkayaa la: A si laa juloo la ì ka a fo meŋ ye ko “Firoolu.” Kora koomalankoolu la suukuwo le mu. Kanoo la kuwo suukuwo.

¹ N sondomoo be faariŋ kuma ñiimaalu le la. Ŋa ñiŋ juloo parendi le ka ke mansa jamundaŋo ti. N neŋo be pareeriŋ suukuu laa la le komeŋ safeeri noolaa la kalaa.

² Ite le mu kewolu kono kee ñiimaa ti, kuma ñiimaalu le ka bo i daa kono. Alla neemata i ma le fo fawu.

³ Mansa kandaa, i la hawusaroo* siti i tewo la. I horomata le, aduŋ i kandaayaata.

⁴ I la kandaayaa kaŋ, i la taamaraŋ suwoo borindi ka nooroo ke, ka tooñaa, fammajiyo, aniŋ tiliŋo taamandi. I be kuu baalu ke la i semboo le la.

⁵ I la kalabeñoolu melunta le, ì ka i jawoolu soo ì jusoolu le to. Banku koteŋ moolu ka boyi i siŋo koto le.

⁶ Alla ye mansayaa meŋ dii i la, a be tu la le fo abadaa. I ka i la mansayaa taamandi niŋ tiliŋo le la.

⁷ I ye tiliŋo kanu le, i ye kuruŋyaa koŋ. Wo le ye a tinna i la Alla ye i toloo seewoo kono ka tambi i ñoŋolu la.

⁸ I la dendika baalu bee seerandita niŋ seerandi feŋolu le la. Kontiŋ kosilaalu ka i seewondi mansabuŋolu le kono, mennu kono ñarandita niŋ samañiŋolu la.

⁹ I la musubuŋo kono, mansa doolu dimmusoolu le be jee. I la mansasiiraŋo bulubaa karoo la, maañoo ka tara wo le to, a ye saniforoolu duŋ.

¹⁰ Muna dimmusuriŋ, i tuloo loo, i ye i lamoyi n na. I hakiloo bo i la moolu kaŋ, aniŋ i faa suwo.

¹¹ I la ñiiñaa be i la kuwo buuñandi la mansa ma le, bayiri i maariikee le mu, wo to soŋ a ye.

¹² Tire saatee moolu be i ñaañini la niŋ soorifeŋolu le la, naafulutii baalu be i ñaañini la le.

¹³ Mansa maañoo dunta mansabuŋo kono, a niŋ a la ñiiñaa baa, sani daarifaanoolu be dundiŋ a la.

¹⁴ A niŋ a la duŋ feŋ ñiimaalu, ì ye a dandaŋ mansa yaa, maañoo dandaŋ sunkutoolu be bulariŋ a nooma.

¹⁵ Moolu ye ì dandaŋ seewoo niŋ jusulaa le kono, ì ye ì dundi mansabuŋo kono.

¹⁶ Mansa, i koomalankoolu be ke la mansoolu le ti ko i mumuñolu, aduŋ ì be ke la maralilaalu le ti bankoo bee kaŋ.

¹⁷ M be a tinna le i too ye bo jamaani naalaalu bee kono, aduŋ moolu be i jayi la le fo abadaa.