Jabuuroolu 41 - Mandinka Bible

Saasaatoo la duwaa, ka Alla la maakoyiroo ñini

Meŋ be suukuulaa ñaatonkayaa la: Dawuda la Jabuuroo le mu.

¹ Neemoo be moo le ye meŋ ka moo koririŋolu hati, Yaawe* be a tankandi la le mantooroo waatoo la.

² Yaawe be a tanka la le ka a tu baluwo to. A be neema la a ma bankoo kaŋ ne. A te a tu la a jawoolu ye ì sawoo soto a la.

³ Yaawe le be a deemaa la niŋ saasaa ye a landi, ate le be a murundi la jaatikendeyaa to.

⁴ Nte kumata le ko, “Hee Yaawe, hiina n na, i ye n kendeyandi, kaatu ŋa junuboo le ke i la.”

⁵ N jawoolu ka kuma jawoolu le fo m ma ko, “Muna a te faa la baŋ, fo a too si buruka fereŋ?”

⁶ Niŋ meŋ naata n juubee, a ka kuma kenseŋolu le fo, wo ye a tara jawuyaa le be faariŋ a sondomoo kono. Niŋ a fintita banta, a ka taa danteeroo le la taariŋ.

⁷ Mennu bee ye n koŋ ka n na kuwo dukuduku ñoo ye le. Ì ka kuu jawoo le ŋaniya n ye.

⁸ Ì ka a fo le ko, “Kooroo le kupita a kaŋ, a te wuli la a noo to kotenke.”

⁹ Hani n teeri kendoo, n laata meŋ na, n niŋ a ka deŋ n na domoroo la, a yelemata n jawoo ti le.

¹⁰ Dukaree Yaawe, balafaa n ye, i ye n kendeyandi, fo n si n joo ì to.

¹¹ Ŋa a loŋ ñiŋ ne to ko, n na kuwo ye i kontaani le, bayiri n jawoolu te a fo la ko, ì ye i kutu n na le.

¹² I ye i buloo duŋ n koto le, n na sootaaribaliyaa kaŋ, aduŋ i ye n sabatindi i fee le fo fawu.

¹³ Tentoo be Yaawe ye, Banisirayila la Alla, ka bo saayiŋ ka taa fo abadaa. Amiin! Amiin!