Jabuuroolu 40 - Mandinka Bible

Maakoyiroo duwaa

Meŋ be suukuulaa ñaatonkayaa la: Dawuda la Jabuuroo.

¹ N tarata Yaawe* la maakoyiroo batu kaŋ muñoo kono le. A ye a tuloo loo n na, aduŋ a ye n kumboo kaŋo moyi le.

² A ye n saba ka m fintindi naŋ kasaara dinkoo kono, ka bo naŋ potoo mereŋo kono, aduŋ a ye n londi bere baa kaŋ, ka a tinna ŋa taama, n te taki la.

³ A ye suukuu kutoo duŋ n daa ka ǹ na Alla jayi. Moo jamaa le be wo je la, ì ye masilaŋ, aduŋ ì be ì jikoo loo la Yaawe kaŋ ne.

⁴ Seewoo be moo le ye meŋ jikita Yaawe la, meŋ buka jiki faŋ wara moolu la, waraŋ ka kafu moolu ma mennu ye feŋ kenseŋolu muta Alla ti.

⁵ Kooni Yaawe, n na Alla, i ye kaawakuu jamaa le ke. I ye kuu baa jamaa le parendi ntolu ye. Tembeñoo te tara noo la ite la. Niŋ ŋa a kata ka ì bee fo, ì yaatewo tambita kontiroo la le.

⁶ Ite buka seewoo beeyaŋ sadaalu* la, aniŋ siimaŋ sadaalu. I maŋ ñiŋ kaniŋ ka jani sadaalu bondi, waraŋ junube kafarilaŋ sadaalu, bari i ye tuloo ke n na le ka n lamoyi i la.

⁷ Bituŋ n kumata ko, “M fele, n naata le, ka kuwo ke meŋ safeeta n ye Luwaa Kitaaboo* kono.

⁸ N hameta le ka i la lafoo taamandi, kaatu i la karandiroo be n sondomoo kono le, n na Alla.”

⁹ Yaawe, i la moolu la beŋ baa to, ŋa kibaari diimaa fo le, i ye ǹ tankandi ñaameŋ. I ye a loŋ ne ko, n te n daa kaari la a foo la.

¹⁰ I ye ǹ deemaa ñaameŋ ka ǹ tankandi, m maŋ a tu maaboriŋ n kono. I ye ǹ deemaa ñaameŋ ka ǹ tankandi. Ŋa a fo le i tuta looriŋ ǹ ye ñaameŋ, aniŋ i ye ǹ tankandi ñaameŋ. M maŋ tu deyiriŋ ka i la kanu bambaloo niŋ i la tiliŋo maabo i la moolu la beŋ baa to.

¹¹ Yaawe, kana balaŋ ka i la balafaa yitandi n na. I la tiliŋo niŋ kanu bambaloo ye tara m fee, ka n tanka fo abadaa.

¹² Mantoora kuwolu be n ye karoo bee le la, n te ì yaatewo konti noo la. N na junuboolu tambita n kunna le, fo m buka n je noo. Ì siyaata n kuntiña kesoolu ti le, fo n jikilateyita.

¹³ Dukaree Yaawe, n tankandi. Yaawe, naa katabake ka m maakoyi.

¹⁴ Allamaa moolu ye malu mennu be a kata kaŋ ka m faa. Allamaa ì muumewo ye piwu. Mennu be lafiriŋ n na mantooroo la, Allamaa ì ye muru ì koo la, ì ye malu.

¹⁵ Mennu ka n ñaawali, Allamaa ì ye malu fo a ye tambi ì kunna.

¹⁶ Allamaa moolu mennu bee ka i ñiniŋ, ì ye seewoo aniŋ ì ye jusulaa. Moolu mennu be ñaaniriŋ kiisoo la i bulu, Allamaa ì ye tu la a fo la ko, “Yaawe warata le.”

¹⁷ Maariyo, nte korita le, aduŋ m mu fentaŋo le ti, bari i ye n hati le. Ite le mu m maakoyilaa ti, aniŋ n kiisalaa. Hee n na Alla, kana mee ka m maakoyi.