Jabuuroolu 36 - Mandinka Bible

Hadamadiŋolu la kuruŋyaa aniŋ Alla la beteyaa

Meŋ be suukuulaa ñaatonkayaa la: Dawuda la Jabuuroo le mu, Yaawe la dookuulaa.

¹ Junuboo le ka kuma moo kuruŋo ye, a sondomoo kono, Alla ñaasilaŋo te a la fereŋ.

² A ye a faŋ wara baake le, fo a buka a la boyidaa je noo, a ye a koŋ.

³ A daakumoolu mu kuruŋyaa niŋ neeneeroo le ti. A ye a koo dii ñiŋ na le ka ñaameŋ kuwo ke, aniŋ kuu kendoo.

⁴ A ka kuruŋyaa feeroolu le siti hani niŋ a be laariŋ laaraŋo kaŋ. Kuu jawu kewo le mu a la muraadoo ti. A maŋ i baŋ kuu jawu to.

⁵ Yaawe*, i la kanu bambaloo la waroo nakita saŋ fatoolu la le, i la tiliŋo futata minaayoolu ma le.

⁶ I la kiitiyolu be looriŋ tooñaa le kaŋ, ì bambanta le ko konkoolu, ì diinonta ko fankaasoo. Hee Yaawe, hadamadiŋolu bee la tankoo be ite le bulu, aniŋ daafeŋolu.

⁷ I la kanu bambaloo tinewo warata le. Hadamadiŋolu ka tankoo ñini ite le dampaŋo koto, moo baa, moondiŋ.

⁸ Ì ka baluu domori fuumariŋo le la, i ka meŋ dii ka bo i taradulaa to. I la beteyaa baajiimaa le ka woyi, moolu ka i miŋ a la.

⁹ Ite le mu baluwo diilaa ti, aduŋ i la maloo le ka a saabu ntolu ka maloo je.

¹⁰ Dukaree, tu i la kanu bambaloo kaŋ moolu ye mennu ye ite loŋ, aduŋ i si neema moolu ma tiliŋo be mennu sondomoo kono.

¹¹ Kana soŋ faŋ wara moolu siŋo ye dori n kaŋ, waraŋ moo kuruŋolu ye ì buloo teeka ka m bayi.

¹² A fele, moo jawoolu boyita le, ì busandita duuma, ì maŋ wuli noo.