Jabuuroolu 35 - Mandinka Bible

Maakoyiri Duwaaraŋo

Dawuda la Jabuuroo.

¹ Hee Yaawe*, moolu kele mennu ka n kele, aduŋ i si moolu tuumi mennu ka n tuumi.

² I la kelejooraŋo taa n ye, aniŋ i la koteeroo*, i ye wuli keloo la ka m maakoyi.

³ I la sooroo niŋ i la hawusaroo* teeka m bayindilaalu kamma. N dankeneyandi ko i be n tanka la le.

⁴ Allamaa mennu bee ka a kata ka m faa, ì ye bula maloo niŋ jutunnayaa kono. Allamaa mennu ka kuu jawoo siti n kamma, ì ye muru ì koo la, ì ye piwu.

⁵ Allamaa ì ye ke ko fuufulewo, foñoo kali ì tindi, Yaawe la malaayikoo ye tara ì bayindi kaŋ.

⁶ Allamaa ì taaraŋ siloo ye ke dulaa dibiriŋo niŋ dulaa namariŋo ti, Yaawe la malaayikoo ye tara ì busa kaŋ ka ì boyindi.

⁷ Ì maŋ daliila soto ka jaloo laa nte kamma, ka jamfaa dinkoo siŋ n kamma, daliila te a la.

⁸ Allamaa kasaaroo ye boyi ì kaŋ moonewo kono, ì ye jaloo meŋ laa n kamma, a ye ì faŋolu muta, ì ye bula dinkoo kono ka kasaara.

⁹ Wo le to m be jusulaa la Yaawe la kuwo la, ka seewoo a la n tankandoo kaŋ.

¹⁰ N suufoolu faŋo si a fo ko, “Hee Yaawe, jumaa le ka munta ko ite? Ite le ka sembentaŋo tanka sembemaa ma, ka fentaŋolu niŋ moo koririŋolu bondi moolu bulu mennu ka ì mantoora.”

¹¹ Seedenduri jawoolu le ka wuli n kamma, ì ka n tuumi kuwolu la m maŋ feŋ loŋ mennu to.

¹² Ì ye n na ñiiñaa joo jawuyaa le la, ì ye n tu kiidoo kono.

¹³ Bari nte de, niŋ tuma meŋ na itolu saasaata, n ka booto funtoo le duŋ ka n na niikuyaa yitandi. N ka suŋo le laa m faŋ kaŋ, ka duwaa fammajiyo kono.

¹⁴ A ka munta le n teerimaa waraŋ m baadiŋo la kuwo sunoo le be n na. N ka tara jirandiŋ, n niŋ woosiyo, ko moo meŋ ka a baamaa la saŋo kumboo.

¹⁵ Bari mantooroo laata nte kaŋ doroŋ, itolu bee kafuta ñoo ma, ì niŋ jusulaa. Ì kuruta n na, ka n ñaawali, boyinkannaalu, m maŋ mennu loŋ, ka n kajafi, fo a maŋ dandulaa soto.

¹⁶ Ì la ñaawaliroo jawuyaata le ko Alla sookilaalu. Ì kamfaatoo ka i ñimmakiŋ n kamma le.

¹⁷ Hee Maariyo, janniŋ muŋ tuma le mu i be tara la juubeeroo doroŋ na? N tankandi ì la boyinkaŋo ma. N niyo tankandi ñiŋ jatoolu ma.

¹⁸ M be i tentu la i la moolu la beŋ baa to le ka i jayi jamaa bee ñaatiliŋo la.

¹⁹ Kana soŋ n jawoolu ye jele n na. Ì mu n jawoolu le ti, daliila te a la. Kana soŋ n konnantewolu ye ì ñaalu kati ñoo ye n na kuwo la.

²⁰ Ì daa te kayira kuu to, ì ka faniyaa kumoolu le fo banku moo tenkundiŋolu ma.

²¹ Ì ye ì daalu yele le ka wuuri n kamma ko, “Je! Je! Ntolu faŋolu ñaa le ye i je a la.”

²² Hee Yaawe, ite ye ñiŋ je le. Kana tu deyiriŋ. Hee Maariyo, kana jamfa n na.

²³ I faŋo ye wuli, i ye loo n na boloo ye. M Maarii Alla, loo n na boloo ye.

²⁴ Hee Yaawe, n na Alla, n koyindi ka bo niŋ i la tiliŋo la, aduŋ kana soŋ n jawoolu ye jele n na.

²⁵ Kana soŋ ì ye a fo ì faŋ ma ko, “A fele, ŋà n jusulaa kuwo soto a la le.” Ì ye a fo ko, “Ŋà n kutu a la le kendeke.”

²⁶ Allamaa mennu ka jele n na kooroo la, ì bee ye bula maloo kono, ì ye piwu. Allamaa mennu ka ì faŋ wara n ti, maloo niŋ jutunnayaa ye feenee ì kaŋ.

²⁷ Allamaa mennu ye boloo ŋaniya n ye, wolu ye wuuri seewoo niŋ jusulaa kono, ì ye tara a fo la ko, “Yaawe warata le, ate meŋ ka kontaani nte la kayiroo la, a la dookuulaa.”

²⁸ Wo to le m be i la tiliŋo kankulaa la, ka i jayi luŋ-wo-luŋ.