Jabuuroolu 34 - Mandinka Bible

Ka Alla tentu a la beteyaa kaŋ

Dawuda la Jabuuroo, waatoo meŋ na a ye a faŋ ke ñaamaatoo ti Abimeleki ñaatiliŋo la, fo a ye a bayi.

¹ M be tu la Yaawe* jayi la le doroŋ, n te n dahaa la a tentoo la.

² Nte be jayiroo ke la Yaawe kekuwolu la le. Moo toorariŋolu bee, ali i lamoyi n na, ali ye seewoo.

³ Ali kafu m ma ka Yaawe la waroo kankulaa, ka a too la waroo suukuu ñoo la.

⁴ N duwaata ka Yaawe daani, aduŋ a ye n jaabi le, ka m bondi n na dewuŋ kuwolu bee kono.

⁵ Niŋ ali ye ali ñaa loo ate kaŋ, ali be jusulaa la le, aduŋ ali te bula la maloo kono.

⁶ Nte koritoo woosiita a ye le, a ye n jaabi, aduŋ a ye n kiisa n na mantoora kuwolu bee kono le.

⁷ Yaawe la malaayikoo le ka moolu kanta, mennu ye a kuliyaa, aduŋ a ka ì tanka le.

⁸ Moo-wo-moo si a juubee a faŋ ye Yaawe beteyaata ñaameŋ. Seewoo be moo le ye meŋ ka i tuuku a la.

⁹ Alitolu mennu mu Yaawe la moo senuŋolu ti, ali a kuliyaa, kaatu mennu ye a kuliyaa, feŋ buka ì dasa.

¹⁰ Hani jatoolu ka foo le, aduŋ ì ka konko, bari moolu mennu jikita Yaawe la, feŋ kende buka ì dasa.

¹¹ N diŋ kusaŋolu, ali naa, ali ye i lamoyi n na, ŋa ali karandi Yaawe ñaasilaŋo la.

¹² Jumaa le maŋ baluwo kanu ali kono? Jumaa le maŋ tara ñaaniriŋ siimaayaa la, aniŋ baluu diimaa?

¹³ Wo to i maarii si i neŋo fata kuma jawoo ma, i ye fata faniyaa foo ma.

¹⁴ I bo kuu jawoo to, i ye baara kuu kendoo la. Kayiroo ñini, i ye a ke i hame kuwo ti.

¹⁵ Yaawe ñaa ka tara looriŋ moo tilindiŋolu kaŋ ne, aduŋ a tuloo ka tu looriŋ ne ka ì woosiikaŋo moyi.

¹⁶ Bari a ka kuu jawu kelaalu kiitindi le, ka ì buruka fereŋ, fo moo hakili kana bula ì la.

¹⁷ Niŋ moo tilindiŋolu woosiita Yaawe ye, ì ye a daani maakoyiroo la, a ka ì danku le, aduŋ a ka ì kiisa ì la mantooroolu bee le kono.

¹⁸ Yaawe be moolu fee le, mennu jikilateyita, aduŋ a ka moolu tankandi le, mennu jikoo banta fereŋ.

¹⁹ Mantoora kuu jamaa le ka laa moo tilindiŋo kaŋ, bari Yaawe ka a kiisa ì bee le kono.

²⁰ Yaawe ka tu a kantariŋ ne doroŋ, aduŋ hani kiliŋ te kati la a kuloolu kono.

²¹ Kuu jawoo le be moo jawoolu faa la, aduŋ moolu mennu ye moo tilindiŋolu koŋ, itolu le be jarabi la.

²² Yaawe le ka a la dookuulaalu niyo tanka, aduŋ meŋ-wo-meŋ ka i tuuku a la, a te jarabi la.