Jabuuroolu 31 - Mandinka Bible

Ka i faŋ karafa Alla ma

Meŋ be suukuulaa ñaatonkayaa la: Dawuda la Jabuuroo le mu.

¹ Hee Yaawe*, m bambuta ite le kooma, kana soŋ ŋa malu muumeeke. N tankandi i la tiliŋo kaŋ.

² I tuloo tu n to, i ye m bondi katabake. Ke n ye semberaŋ beroo ti, aniŋ tata bambandiŋo, ka n tankandi.

³ Bayiri i mu n ye semberaŋ beroo niŋ tatoo le ti, n kenkeŋ, i ye n kanta, i too kamma la.

⁴ N kanandi jaloo ma, meŋ laata n kamma, kaatu ite le mu n jikiraŋo ti.

⁵ Ŋa n niyo karafa i ma. Yaawe, i ye m bondi le, ite meŋ mu Alla ti, tooñaatiyo.

⁶ Ŋa moolu koŋ ne, mennu ka jalaŋ kenseŋolu batu, aduŋ n dankeneyaata Yaawe la le.

⁷ M be jusulaa la le, ŋa seewoo i la kanu bambaloo kamma la, kaatu i ye n na niitooroo je le, i ye n na bataa kuwolu loŋ,

⁸ aduŋ i maŋ n duŋ n jawoolu bulu, bari i ye n londi dulaa fanuriŋo le to.

⁹ Yaawe, balafaa n ye, kaatu m be mantooroo le kono, niikuyaa ye a tinna le, fo n ñaalu korita, n niyo niŋ n jaatoo fanaa teŋ.

¹⁰ Kaatu n na baluwo keta niitooroo le ti, aniŋ sikisikoo doroŋ, m baluu saŋolu bee la. N na ŋayiboo ye a tinna le n semboo banta. N kuloolu faŋo korita le.

¹¹ N keta n jawoolu bee ye jelefeŋo le ti, hani n siiñoolu le faŋo taa jawuyaata, aduŋ n keta n lombaalu tanoo le ti. Niŋ moolu ye n je siloo kaŋ, ì ka bori n na le.

¹² N na kuwo bota moolu hakiloo to le, ko moo meŋ faata. N keta le ko daandiŋ teyiriŋo.

¹³ Ŋa a moyi le moo jamaa ka meŋ dumbu ko, maasiiboo le be karoo bee la. Ì ka jamfaa le siti n kamma, ì be feeroo taamandi kaŋ ne, ka n niyo taa.

¹⁴ Bari Yaawe, nte be jikiriŋ ite le la de, n ko ite le mu n na Alla ti.

¹⁵ N na baluwo muumewo be ite le bulu. N tankandi n jawoolu bulu, mennu ka n toorandi.

¹⁶ I ñaa diyaa m fee, i la dookuulaa, i ye n tankandi i la kanu bambaloo kamma la.

¹⁷ Yaawe, kana soŋ ŋa malu muumeeke, kaatu n kumboota i ye le. Moo kuruŋolu duŋ maloo kono, ì ye tara deyiriŋ kaburoo kono.

¹⁸ Faniyaa folaalu daa siti, mennu ka kuma jawu baalu fo moo tilindiŋolu ma, aniŋ faŋ waroo niŋ jutunnayaa.

¹⁹ Hee, i la neemoo warañaa, meŋ be maaboriŋ i bulu moolu ye, mennu silata i la, aduŋ i ka a jindi moolu le kaŋ, mennu be bamburiŋ i kooma, moo bee ñaa ye a je.

²⁰ I ka ì sutura le, ì ye tara i fee suturoo kono, ka tanka moolu la kiriikaraa ma. I ka ì muta kuu i sabatidulaa le to, ka ì tankandi neŋ fatiŋolu ma.

²¹ Tenturoo be Yaawe ye, kaatu a ye a la kanu bambaloo kaawakuumaa le yitandi n na, kabiriŋ m be deteriŋ, a ka munta m be saatee sukiriŋo le kono.

²² N na jaakaloo kono, ŋa a miira le ko, n wafatita i ñaa koto le. Bari i ye n kumboo kaŋo moyi le, kabiriŋ ŋa i daani ka balafaa n ye.

²³ Ali Yaawe kanu, alitolu mennu bee mu a la moolu ti. Yaawe ka moo tilindiŋolu kanta le, bari a ka julujooñaa jawu le ke faŋ wara moolu la.

²⁴ Alitolu mennu bee be jikiriŋ Yaawe la, ali bambaŋ, ali ye fatiyaa.