Jabuuroolu 29 - Mandinka Bible

Maariyo kumakaŋo turubaadoo kono

Dawuda la Jabuuroo.

¹ Alitolu malaayikoolu, ali horomoo dii Yaawe* la, ali a jayi a la semboo niŋ a la kallankeeyaa* kaŋ.

² Ali Yaawe jayi a semboo niŋ a too la waroo kaŋ, ali Yaawe batu, a la kallankeeyaa niŋ a la seneyaa kono.

³ Yaawe kumakaŋo jiita baajiyolu kaŋ, Alla, Mansa Kallankewo bumbunta, aduŋ a kumakaŋo ye i danku fankaasoolu to.

⁴ Yaawe kumakaŋo semboo warata le, a warata, aduŋ a kaawakuuyaata.

⁵ Yaawe kumakaŋo ka yirisuŋ baalu katiŋ-katiŋ ne, hani Libanooni sedari* yiroolu, a ka ì teleŋ-teleŋ ne.

⁶ A ka konkoolu sawundi le ko ninsiriŋo, ka ì buunandi ko tuuraariŋo, hani Libanooni niŋ Herimoni* Konko baalu.

⁷ Yaawe kumakaŋo ka saŋo ŋalasi le.

⁸ A kumakaŋo ka keñewuloo* jiijandi le, a ka Kadesi keñewuloo jarajarandi.

⁹ Yaawe kumakaŋo ka yiri baalu firifirindi le, a ka sutoolu warawara, aduŋ moolu mennu bee be a batudulaa to, ka wuuri le, ka a fo ko, “Alla le taa mu semboo niŋ waroo ti.”

¹⁰ Yaawe le be marariŋ baajii diinondiŋolu ma. A la mansayaa le be tu la fo abadaa.

¹¹ Allamaa Yaawe ye semboo dii a la moolu la. Allamaa Yaawe ye neema a la moolu ma kayiroo la.