Jabuuroolu 28 - Mandinka Bible

Alla la maakoyiroo duwaa aniŋ tenturoo

Dawuda la Jabuuroo.

¹ Hee Yaawe*, n ka ite le kumandi, n semberaŋ beroo, kana i tulu faa m ma, kaatu niŋ i maŋ i danku m ma, m be ke la le ko moolu mennu taata saayaa dinkoo kono.

² I lamoyi n kumboo kaŋo la, niŋ m be maakoyiri ñiniŋo la, niŋ ŋa m buloolu wulindi ka duwaa i la buŋ senuŋ baa ñaatiliŋo la.

³ Kana n niŋ moo kuruŋolu koora ñoo la, kuu jawu kelaalu, mennu ka kayiroo fo ì daa la ì siiñoolu ye, wo tumoo konnanteeyaa be ì sondomoolu kono.

⁴ Ì ye meŋ ke, ì joo a la, ì la baara jawoolu, ì ye mennu ke. Ì baarata meŋ na, ì joo a la. Ì ye meŋ baara, a seyi ì ma.

⁵ Bayiri ì maŋ ite Yaawe la keroo muta feŋ ti, waraŋ i ye meŋ daa, i be ì tumbuŋ na le, aduŋ i te ì wulindi la kotenke.

⁶ Tenturoo be Yaawe ye, kaatu a ye n kumboo kaŋo moyi le, biriŋ m be maakoyiri ñiniŋo la.

⁷ Yaawe le mu n semboo ti, aniŋ n na tankaraŋ koteeroo*, n jikita a la niŋ n sondomoo bee le la. A ye m maakoyi le, aduŋ n jusulaata baake le. Wo kamma la, m be a tentu la niŋ suukuwolu le la.

⁸ Yaawe le mu a la moolu semboo ti, aduŋ a mu tuukuraŋo niŋ tankadulaa le ti a la tomboŋ moo ye.

⁹ Yaawe, i la tomboŋ moolu tankandi, aduŋ i si neema ì ma. I si ke ì kantalaa ti, i ye ì topatoo.