Jabuuroolu 27 - Mandinka Bible

Dankeneyaa suukuwo

Dawuda la Jabuuroo.

¹ Yaawe* le mu n na lampoo ti, aniŋ n na tankoo, m be sila la jumaa le la? Yaawe le mu n na baluwo tuukuraŋo ti, jumaa le la kuwo be n kija fara la?

² Niŋ moo jawoolu boyita n kaŋ, ka i baluu n suboo la, itolu mennu mu n konnantewolu ti, aniŋ n jawoolu ì be taki la le, ì ye boyi.

³ Hani niŋ kelediŋ kafoo le ye n kuru, n kija te m fara la. Hani niŋ keloo le wulita n kamma, wo ñaa-wo-ñaa m be dankeneyaa la le.

⁴ Kuu kiliŋ ŋa Yaawe daani wo le la, aduŋ m be wo le ñiniŋ kaŋ, ka tara sabatiriŋ a batudulaa buŋo kono m baluu tiloolu bee la, ka a la kallankeeyaa* fele, aniŋ ka bankeeroo ñiniŋ a batudulaa.

⁵ Kaatu mantooroo luŋo la, a be n sansaŋ na le. A be m maabo la a batudulaa suturariŋo le kono, aduŋ a be n londi la tankaraŋ bere baa le kaŋ.

⁶ M be n kutu la n jawoolu la le, mennu ye m murubeŋ, aduŋ m be sadaalu* bo la a batudulaa to le, n niŋ wuuroo, seewoo kamma la. M be suukuwolu laa la le ka Yaawe la waroo fo.

⁷ Yaawe, i lamoyi n na kumandiri kaŋo la, balafaa n ye, i ye n jaabi.

⁸ N sondomoo ye a yitandi n na le ko, i ye ñiŋ ne yaamari ko, “Ali n ñaañini.” Wo to Yaawe, nte ka i ñaañini le.

⁹ Kana i ñaa kaasi n na. Kana kamfaa, i ye nte i la dookuulaa bayi. Ite le mu m maakoyilaa ti. Hee Alla, n tankandilaa, kana m bula, aduŋ i kana i koo dii n na.

¹⁰ Hani niŋ m baa niŋ m faa ye ì koo dii n na, Yaawe be n taa la le.

¹¹ Yaawe, n karandi ka taama i la siloo la, aduŋ i si n samba sila koyiriŋo la, n jawoolu la kuwo kamma la.

¹² Kana n tu n konnantewolu sawoo to, kaatu seedenduroolu le wulita n kamma, aniŋ fitina kurukurulaalu.

¹³ N dankeneyaata le ko, m be Yaawe la beteyaa je la le, ñiŋ duniyaa baluwo to.

¹⁴ I lamoyi Yaawe ma. I si bambaŋ, i ye fatiyaa, aduŋ i si i lamoyi Yaawe ma.