Jabuuroolu 24 - Mandinka Bible

Jumaa le si duŋ noo Alla Batudulaa Buŋo kono?

Dawuda la Jabuuroo.

¹ Bankoo mu Yaawe* taa le ti, aniŋ feŋ-wo-feŋ be a kaŋ. Duniyaa bee mu a taa le ti, aniŋ moolu mennu bee be a kono.

² A ye a loo bankoo kono ñaapuuloolu le kaŋ, aduŋ a ye a fondamaŋolu laa fankaasoolu teroo le to.

³ Jumaa le si sele noo Yaawe la Konkoo kaŋ? Jumaa le si loo noo a dulaa senuŋo kono?

⁴ Wo le mu moo ti meŋ sondomoo seneyaata, aniŋ a la baaroo, meŋ buka a faŋo duŋ fulaŋ kafuñooyaa kuwo to, aduŋ a buka i kali faniyaa kaŋ.

⁵ A be neemoo soto la Yaawe bulu le. Alla le be boloo dii la a la, aniŋ kiisoo.

⁶ Wolu le mu moolu ti, mennu ka naa Alla kaŋ, mennu ka sutiyaa Yaakuba la Alla la. S

⁷ Dundaŋ daalu ye yele, ali nunto dundaŋ daalu yele hawu, fo Mansa Kallankewo* si duŋ naŋ.

⁸ Jumaa le mu ñiŋ Mansa Kallankewo ti? Yaawe le mu, a bambanta, aduŋ a semboo warata, Yaawe semboo warata keloo to.

⁹ Dundaŋ daalu ye yele, ali nunto dundaŋ daalu yele hawu, fo Mansa Kallankewo si duŋ naŋ.

¹⁰ Jumaa le mu ñiŋ Mansa Kallankewo ti? Yaawe Alihawaa Maariyo* le mu. Ate le mu Mansa Kallankewo ti. S