Jabuuroolu 23 - Mandinka Bible

Maariyo le mu ǹ kantalaa ti

Dawuda la Jabuuroo.

¹ Yaawe* le mu n kantalaa ti, feŋ te n dasa la.

² A ka n sabatindi dulaa neemariŋo le to. A ka n samba jii tenkeyaariŋo le to.

³ A ka n niyo bambandi kuu le. A ka n samba sila tilindiŋo le la, a too kamma la.

⁴ Hani niŋ m be taama kaŋ wulumbaŋ dibiŋ baa kono, n te sila la kuu jawu la, kaatu i be m fee le. I la kantarilaŋ pudoŋo niŋ i la taamaraŋ dokoo, wolu le ka n jusulandi.

⁵ I ye domori buuñaariŋo le parendi n ye, n jawoolu ñaatiliŋo la. I ye tulu seeralaa maa n kuŋo la. I ye n na mindaŋo fandi fo a ka boŋ.

⁶ I la beteyaa niŋ kanu bambaloo le be n nooma la, m baluu tiloolu bee la. Aduŋ m be sabati la Yaawe la Buŋo kono le fo n siyo daŋo.