Jabuuroolu 21 - Mandinka Bible

Mansa ye nooroo ke Alla la maakoyiroo kaŋ

Meŋ be suukuulaa ñaatonkayaa la: Dawuda la Jabuuroo le mu.

¹ Hee Yaawe*, mansa jusulaata le, kaatu i ye a bambandi le, a seewoota baake le i la maakoyiroo kaŋ, ka a jawoolu noo.

² I ye a hame kuwolu dii a la le, mennu be a sondomoo to. I maŋ a bali kuwolu la a ye mennu ñininkaa. S

³ I ye neemafeŋ kendoolu le naati a kaŋ. Ite le ye saniforo naafoo ke a kuŋo to ka a toloo.

⁴ A ye i daani le fo a si mee, i ye a dii a la, meŋ keta siimaayaa baa ti.

⁵ A ye horoma baa soto le ka bo niŋ i la maakoyiroo la ka a jawoolu noo. I ye horomoo niŋ mansayaa semboo dii a la le.

⁶ I neemata a ma le famfaŋ, fo abadaa. A ka jusulaa ñiŋ na le ko, i be a fee le.

⁷ Bayiri mansa dankeneyaata Yaawe la le, wo to ka bo niŋ ate Alla Mansa Tallaa la kanu bambaloo la, a te wutu la a noo to.

⁸ I buloo be laa la i jawoolu bee kaŋ ne. I bulu sembemaa be laa la moolu kaŋ ne mennu ye i koŋ.

⁹ Niŋ i naata, i be ì jani la le ko fuuri dimbaa ka janiroo ke ñaameŋ. Yaawe be ì kunuŋ na a la kamfaa baa kono le, dimbaa ye ì domo.

¹⁰ I be ì koomalankoolu kasaara la duniyaa kono le, ka ì turoo tumbuŋ hadamadiŋolu kono.

¹¹ Hani niŋ i jawoolu tafawuta i kamma, ì te ñaatotaa soto la ì la feere jawoolu to.

¹² I be ì ñaato kuntu la i la kalabeñoolu le la, ka ì murundi ì koo la.

¹³ Yaawe, jayiroo be i ye i la bambaŋo kaŋ. M̀ be suukuwo laa la le ka i jayi i semboo kaŋ.