Jabuuroolu 20 - Mandinka Bible

Duwaa, mansa ye

Meŋ be suukuulaa ñaatonkayaa la: Dawuda la Jabuuroo le mu.

¹ Allamaa Yaawe* ye i la duwaa jaabi mantooroo waatoo la. Allamaa Yaakuba la Alla ye i tankandi ka bo niŋ a too la.

² Allamaa a ye maakoyiroo dii i la ka bo a Batudulaa Senuŋo to, a ye deemaaroo dii i la ka bo Siyoni* Konkoo to.

³ Allamaa a ye i la sadaalu* bee muta, a ye soŋ i la jani sadaalu la. S

⁴ Allamaa a ye i jusulaa kuwolu ke i ye, ka i la natoolu bee timmandi.

⁵ Wo to le m̀ be wuuri la seewoo kono, i la nooroo kaŋ, ka ǹ na bandeeroolu wulindi n na Alla tooyaa la. Allamaa Yaawe ye kuwolu bee ke i ye, i ye a daani mennu la.

⁶ Silaŋ ŋa a loŋ ne ko, Yaawe be a la tomboŋ mansa maakoyi la le. A be a jaabi la le ka bo a la Arijana senuŋo kono, ka a jawoolu noo a ye baake, ka bo niŋ a sembe baa la.

⁷ Doolu ka tara jikiriŋ keleraŋ sareetoolu* le la, doolu, suwoolu, bari ntolu ka tara jikiriŋ Yaawe, m̀ Maarii Alla too le la.

⁸ Wo moolu be taki la le, ì ye boyi, bari ntolu be wuli la le, ŋà bambaŋ.

⁹ Hee Yaawe ǹ na duwaa jaabi niŋ ŋà i kumandi, i ye mansa maakoyi ka nooroo ke.